కొవిడ్ రెండో దశ ప్రభావం తాత్కాలికమే!

కరోనా రెండో దశ అలజడితో దేశవ్యాప్తంగా మళ్లీ ఆందోళనలు తీవ్రమవుతున్నాయి. దీని వల్ల ఆర్థిక వ్యవస్థ ఒత్తిడికి గురయ్యే అవకాశాలు కనిపిస్తున్నాయి. అయితే ఈ పరిస్థితులు తాత్కాలికమేనని దిగ్గజ స్టాక్ మార్కెట్ పెట్టుబడిదారు.. రాకేశ్​ ఝున్​ఝున్ వాలా అంటున్నారు. ఆయన చెప్పిన మరిన్ని విషయాలు ఇలా ఉన్నాయి.

కరోనా రెండో దశతో ఏర్పడిన సంక్షోభం తాత్కాలికమని షేర్‌ మార్కెట్‌ బిగ్‌ బుల్‌గా పేరుగాంచిన ప్రముఖ పెట్టుబడిదారుడు రాకేశ్‌ ఝున్‌ఝున్‌వాలా అభిప్రాయపడ్డారు. మహమ్మారి రెండో దఫా విజృంభిస్తున్నప్పటికీ.. రెండంకెల వృద్ధి రేటు నమోదు కావడం ఖాయమని ఆశాభావం వ్యక్తం చేశారు. మార్కెట్లు భారీగా దూసుకెళ్లే క్రమంలో ఉన్నాయని తెలిపారు.

మార్కెట్ల భారీ పతనానికి అవకాశాలు..

మార్కెట్‌ సూచీలు ప్రస్తుతం దిద్దుబాటుకు గురవుతుండడంపై స్పందిస్తూ.. ఇది ఎంత కాలం కొనసాగుతుందనేది అంచనా వేయలేమన్నారు. అలాగే మరింత దిగజారే అవకాశాలు ఉన్నాయాని కూడా చెప్పలేమన్నారు. కరోనా కేసులు 2.50 లక్షలు దాటినప్పటికీ.. మార్కెట్లు మరీ భారీగా పతనమవుతున్న సందర్భాలు లేవని తెలిపారు. కరోనా మరీ అదుపులో లేకుండా పోయి రోజుకి ఆరు లక్షలకు పైగా కేసులు నమోదైతే గానీ మార్కెట్లు పడే సూచనలు కనిపించడం లేదన్నారు.

2020 మంచి అవకాశాలిచ్చింది..

మార్చి 2020లో మార్కెట్లు కుప్పకూలిన విషయం తెలిసిందే. భారత స్టాక్ మార్కెట్‌ చరిత్రను మలుపు తిప్పిన మూడు సందర్భాల్లో అదొకటని ఝున్‌ఝున్‌వాలా అభిప్రాయపడ్డారు. 1989 కేంద్ర బడ్జెట్‌, సెప్టెంబర్‌ 11, 2001 తర్వాత మార్కెట్లు ఎలాంటి అవకాశాల్ని తెచ్చిపెట్టాయో మార్చి 2020 పతనం కూడా మంచి అవకాశాల్ని అందించిందని వివరించారు. ఆ సమయంలో కొనుగోలు చేసిన ఏ షేర్లయినా కనిష్ఠాల నుంచి రెండు, మూడింతలు పెరిగాయని తెలిపారు.

రానున్న రోజుల్లో లోహ రంగం భారీగా లాభపడనుందని ఝున్‌ఝున్‌వాలా అంచనా వేశారు. ఇది మంచి అవకాశాలు ఉన్న రంగమని తెలిపారు. గత 10 ఏళ్లలో ఈ రంగంపై మదుపర్లు తీవ్ర నిర్లక్ష్యం వహించారని పేర్కొన్నారు. సిమెంట్‌, లోహ రంగాల షేర్లలో భారీ వృద్ధి నమోదుకానుందని అంచనా వేశారు.

ఇదీ చదవండి:కొవిడ్‌ భయాలతో తరలిపోతున్న ఎఫ్‌పీఐలు!