కరోనా సంక్షోభం కారణంగా పన్ను చెల్లింపుదారులకు ఉపశమనం కలిగించేందుకు కేంద్ర ప్రభుత్వం కీలక నిర్ణయం తీసుకుంది. ఆదాయపు పన్ను, జీఎస్టీ, కస్టమ్స్, సెంట్రల్ ఎక్సైజ్ రిటర్న్లు తదితర చెల్లింపులపై జూన్ నెలాఖరు వరకు గడువు పెంచింది.
ఈ మేరకు ఆదాయపు పన్ను చట్టంలోని కొన్ని నిబంధనల సడలింపునకు తీసుకొచ్చిన 2020 ఆర్డినెన్స్ను రాష్ట్రపతి రామ్నాథ్ కోవింద్ ఆమోదించారు. వీటితో పాటు పీఎం కేర్స్ ఫండ్కు వచ్చిన విరాళాలపై 100శాతం పన్ను తగ్గించేందుకు అంగీకరించారు.
ఈ ఆర్డినెన్స్ ద్వారా పన్ను చెల్లింపులపై పొడిగించిన కాల పరిమితుల గురించి ముఖ్యమైన విషయాలను తెలుసుకుందాం.
ప్రత్యక్ష పన్ను చెల్లింపులన్నింటికీ జూన్ 30 వరకు పొడిగింపు
- ఆదాయపు పన్ను రిటర్న్లు దాఖలు చేసుకునేందుకు గడువు పెంపు.
- ఆధార్-పాన్ లింక్పై జూన్ నెలాఖరు వరకు గడువు.
- ఐటీ విభాగాల్లో క్లెయిమింగ్ డిడక్షన్పై వివిధ పెట్టుబడులు/ చెల్లింపులకు మినహాయింపు.
- ఐటీ చట్టంలోని 54, 54 జీబీ సెక్షన్ల కింద మూలధన లాభాలకు సంబంధించి పెట్టుబడి, నిర్మాణం,కొనుగోలు చేసే గడువు పెంపు.
- సెజ్ యూనిట్లకు పనులు ప్రారంభించే తేదీ పొడిగింపు.
- వివిధ ప్రత్యక్ష పన్నులపై అధికారులు నోటీసులు జారీ చేసే తేదీ పెంపు- బినామీ చట్టానికి కూడా సడలింపు.
- వివాద్ సే విశ్వాస్ పథకం కింద ఎటువంటి అదనపు చెల్లింపు లేకుండానే జూన్ 30 వరకు చెల్లింపులు జరిపే వీలు.
పరోక్ష పన్నులకూ ఇంతే...
- మార్చి, ఏప్రిల్, మే నెలల్లో చేయాల్సిన సెంట్రల్ ఎక్సైజ్ రిటర్న్ చెల్లింపులకు గడువు పెంపు.
- ఎక్సైజ్ చట్టం 1944 కింద అప్పీల్ దాఖలుకు, అప్లికేషన్ వాపసు తీసుకుకోవడానికి జూన్ నెలాఖరు వరకు అనుమతి.
- కస్టమ్స్ చట్టం 1962 కింద అప్పీల్ దాఖలుకు, అప్లికేషన్ వాపసు కోసం గడువు పొడిగింపు.
- సర్వీస్ టాక్స్కు సంబంధించి అప్పీలు దాఖలుకు గడువు పెంపు.
- సబ్కా వికాస్ పథకం కింద ప్రయోజం పొందేందుకు చెల్లింపు చేసే తేదీకి జూన్ 30కి మార్పు.
