పందుల దెబ్బకు చైనా ఆర్థిక వ్యవస్థ అస్తవ్యస్తం!

చైనాలో పందుల దెబ్బకు వినియోగదారుల ధరల ద్రవ్యోల్బణం ఎనిమిదేళ్ల గరిష్ఠాన్ని తాకింది. గత నవంబర్​లో ద్రవ్యోల్బణం 4.5 శాతంగా నమోదైనట్లు జాతీయ గణాంకాల సంస్థ (ఎన్​బీఎస్​) వెల్లడించింది. చైనాలో ఆఫ్రికన్​ స్వైన్​ ఫీవర్​ వ్యాప్తి చెంది పంది మాంసం సరఫరాపై ప్రభావం పడటమే ఇందుకు కారణం.

చైనాలో పందిమాంసం రోజువారీ ఆహారంలో భాగం. ప్రపంచంలో మూడింట రెండు వంతుల పోర్క్​ను చైనా ఉత్పత్తి చేస్తుంది. అంతే పరిమాణంలో వినియోగిస్తుంది కూడా. అయితే.. చైనాలో ఆఫ్రికన్​ స్వైన్​ ఫీవర్​ వ్యాప్తి చెంది.. పంది మాంసం ధరలు రెండు రెట్లు అధికమయ్యాయి. ఈ కారణంగా నవంబర్​లో ద్రవ్యోల్బణం ఎనిమిదేళ్ల గరిష్ఠాన్ని తాకింది.

4.5 శాతంగా నమోదు..

వినియోగదారుల ధరల సూచీ(సీపీఐ) గత నవంబర్​లో 4.5 శాతంగా నమోదైనట్లు జాతీయ గణాంకాల సంస్థ (ఎన్​బీఎస్​) వెల్లడించింది. అది గత అక్టోబర్​లో 3.8గా ఉండగా తాజాగా నమోదైన లెక్కలు 2012, జనవరి నుంచి ఇప్పటి వరకు గరిష్ఠంగా ఉన్నాయి.

బ్లూమ్​ బర్గ్​ న్యూస్​ సర్వే విశ్లేషకులు ఈఏడాది ద్రవ్యోల్బణం సుమారు 4.3 శాతంగా నమోదవుతుందని అంచనా వేశారు.

స్వైన్​ ఫీవర్​తో..

2018 ఆగస్టు నుంచి చైనాలో ఆఫ్రికన్​ స్వైన్​ ఫీవర్​ వ్యాప్తి చెందింది. పందులకు మాత్రమే సోకే ఈ వ్యాధి వల్ల మానవులకు ఎలాంటి హాని లేకపోయినప్పటికీ.. విధిలేని పరిస్థితుల్లో అధికారులు అధిక సంఖ్యలో పందులను చంపారు. ఫలితంగా చైనాలో పంది మాంసం సరఫరాపై ప్రభావం పడింది. గత నవంబర్​లో మాంసం ధరలు సుమారు 110.2 శాతం మేర పెరిగాయి.

ఇతర ఉత్పత్తులపైనా..

పంది మాంసం ధరల పెరుగుదలతో వినియోగదారులు ఇతర ప్రోటీన్​ వనరులకు మారారు. ఈ కారణంగా దేశంలో గొడ్డు మాంసం(బీఫ్​), గొర్రె మాంసం, కోడిగుడ్ల ధరలు కూడా విపరీతంగా పెరిగాయి.

పందుల ఉత్పత్తిపై చర్యలు..

ప్రస్తుతం చైనాలో పందుల సంఖ్య సుమారు 40 శాతం మేర తగ్గిపోయింది. 2021 నాటికి పందుల సంఖ్యను గతంలో ఉన్న స్థాయికి పునరుద్ధరించేందుకు చర్యలు చేపట్టింది ప్రభుత్వం. పందుల పెంపకందారులకు ప్రోత్సాహకాలు ప్రకటించింది.

పరిస్థితిని చక్కదిద్ది, ద్రవ్యోల్బణాన్ని 3 శాతానికి తగ్గించాలని చైనా లక్ష్యంగా పెట్టుకుంది.

ఇదీ చూడండి: అమెరికాలో మంచు తుపాను బీభత్సం- 50 వాహనాలు ఢీ