బడ్జెట్​ నేపథ్యంలో ఆర్థికవేత్తలతో నేడు మోదీ భేటీ

దేశవ్యాప్తంగా ఉన్న పలువురు ఆర్థికవేత్తలతో ప్రధాని నరేంద్ర మోదీ నేడు నీతి ఆయోగ్​లో భేటీకానున్నారు. ప్రస్తుతం నెలకొన్న వృద్ధి మందగమన పరిస్థితులు, బడ్జెట్ నేపథ్యంలో ఆర్థిక నిపుణుల నుంచి మోదీ కీలక సూచనలు తీసుకునే అవకాశముంది.

వార్షిక బడ్జెట్​ సమీపిస్తున్న తరుణంలో ప్రధానమంత్రి నరేంద్ర మోదీ.. దేశంలోని ఉన్నత ఆర్థికవేత్తలతో నేడు సమావేశం కానున్నట్లు నీతి ఆయోగ్​ వెల్లడించింది. బడ్జెట్​కు ముందు చేసే కసరత్తులో భాగంగానే ఈ భేటీ ఉండనున్నట్లు నీతి ఆయోగ్​ తెలిపింది. గత ఏడాది జూన్​లో 40 మంది ఆర్థిక వేత్తలతో మోదీ భేటీ అయినట్లు గుర్తుచేసింది.

ప్రస్తుతం నెలకొన్న ఆర్థిక వృద్ధి మందగమన పరిస్థితుల నేపథ్యంలో ఆర్థికవేత్తలతో ప్రధాని భేటీకి ప్రాధాన్యం సంతరించుకుంది.

కేంద్ర బడ్జెట్​ ఫిబ్రవరి 1న ప్రవేశపెట్టే అవకాశముంది. దీనిపై ప్రభుత్వ వర్గాలు అధికారిక ప్రకటన చేయాల్సి ఉంది.