వయసు పెరుగుతున్న కొద్దీ జీవన స్థితిగతులు మారుతుంటాయి. కొత్త బాధ్యతలు వచ్చి చేరతాయి. వీటికి అనుగుణంగా మన ఆర్థిక లక్ష్యాలూ మారుతుంటాయి. అయితే, మన పునాదులు బలంగా ఉంటే జీవనం సక్రమంగా సాగిపోతుంది. లేదంటే ఒడుదొడుకులు తప్పవు. ఈ నేపథ్యంలో మనం సంపాదించడం ప్రారంభించగానే సరైన ప్రణాళికతో ముందుకెళ్లాలి. అందు కోసం 30 ఏళ్లు వచ్చే సరికి కొన్ని ఆర్థిక లక్ష్యాలను సాధించాలి. అవేంటో చూద్దాం..
కెరీర్‌పై పెట్టుబడి పెట్టండి..
సాధారణంగా 22 నుంచి 26 ఏళ్ల మధ్య మన వృత్తి జీవితం ప్రారంభమవుతుంది. అయితే, కొత్తగా ఉద్యోగం లేదా వ్యాపారంలోకి అడుగుపెట్టగానే మనకు తెలియని విషయాలను చాలా గుర్తిస్తుంటాం. వాటన్నింటినీ అవగాహన చేసుకోవాలి. అవసరమైతే వాటిలో నైపుణ్యం సాధించేందుకు కొత్త కోర్సులు చేయాలి. లేదా అనుభవజ్ఞుల సాంగత్యంలో మెళకువలు తెలుసుకోవాలి. అందుకోసం ముందు కెరీర్‌పై పెట్టుబడి పెట్టాలి. డబ్బు అవసరం లేని చోట సమయాన్ని పెట్టుబడిగా పెట్టాల్సి ఉంటుంది. ఇది మున్ముందు మన కెరీర్‌కు బలమైన పునాదులు వేస్తుంది.
అత్యవసర నిధి..
సాధారణంగా మూడు నుంచి ఆరు నెలల ఖర్చులకు సరిపడే మొత్తం అత్యవసర నిధి కోసం అందుబాటులో ఉండాలని నిపుణులు చెబుతుంటారు. కరోనా మహమ్మారి వంటి సమయంలో అది చాలా అవసరం. కుటుంబంలో మీరొక్కరే ఆర్జిస్తుంటే.. ఈ అత్యవసర నిధి కనీసం 12 నెలల ఖర్చులకు సరిపడా ఉండాలి. గత కొంతకాలంగా ఏదైనా పెద్ద ఖర్చులు వచ్చాయా, మరోసారి అలాంటివి ఏమైనా ఉండే అవకాశం ఉందా లాంటివీ ఒకసారి ఆలోచించుకోండి. ఇలా అనుకోని ఖర్చులకూ ఎప్పుడూ సిద్ధంగా ఉండాల్సిందే.
రుణాలను ముగించేయండి..
చదువుకుంటున్న సమయంలో చేసిన చిన్న చిన్న రుణాలను ముగించేయాలి. విద్యా రుణం, క్రెడిట్‌ కార్డు లోన్‌, వ్యక్తిగత రుణం, ద్విచక్రవాహన రుణం.. ఇలా ఎలాంటి రుణాలు ఉన్నా 30 ఏళ్ల వయసు వచ్చే లోపు తీర్చేయాలి. లేదంటే వడ్డీ పెరిగి సమస్యలుగా మారతాయి. ఇవి మీ దీర్ఘకాల లక్ష్యాలపై ప్రతికూల ప్రభావం చూపుతాయి.
తెలివిగా పెట్టుబడి పెట్టండి..
30 ఏళ్లు వచ్చే సరికి మీరు పూర్తిగా ఓ పెట్టుబడిదారుడిగా మారాల్సిన అవసరం వస్తుంది. దీర్ఘకాల లక్ష్యాలకు అనుగుణంగా మీ సంపాదన, పొదుపు బట్టి ఎక్కడో ఒకచోట పెట్టుబడి పెట్టక తప్పదు. అప్పుడే మీ లక్ష్యాలను త్వరగా చేరుకోగలుగుతారు. కేవలం సంపాదన, పొదుపు ద్వారా మాత్రమే ఆర్థిక లక్ష్యాలను చేరాలంటే సాధ్యం కాకపోవచ్చు. అలాగే ద్రవ్యోల్బణానికి అనుగుణంగా మన సంపాదన పెరగాలంటే పెట్టుబడి పెట్టక తప్పుదు. అయితే, తెలివిగా పెట్టుబడి పెడితేనే ఉపయోగకరం. అందుకు సరైప పథకాల్ని ఎంచుకోవాలి. లేదా స్థిరాస్తిలో పెట్టుబడి పెట్టాలంటే ఆ రంగంపై పూర్తి అవగాహన పెంచుకోవాలి. మ్యూచువల్‌ ఫండ్లు, ఇన్సూరెన్స్‌, ఈక్విటీ.. ఇలా ఎక్కడ పెట్టుబడి పెట్టాలన్నా ఆర్థిక అంశాలపై కొంత మేర అవగాహన ఉండాలి. లేదంటే నిపుణుల సలహాలు తీసుకోవడం ఉచితం.