సంక్షోభంలో కూరుకుపోయిన ఎస్ బ్యాంకు... 1000 కోట్ల ఈక్వీటీ షేర్లను ఎస్బీఐ సహా 7 ప్రైవేట్ బ్యాంకులకు కేటాయించింది. రూ.10,000 కోట్లకు ఈ షేర్లను ఇచ్చింది.
ఎస్ బ్యాంక్లో రూ.250 కోట్లు పెట్టుబడి పెట్టనున్నట్లు ఐడీఎఫ్‌సీ ఫస్ట్‌ బ్యాంక్ ప్రకటించింది. ఎస్ బ్యాంక్లో ప్రైవేటు బ్యాంకుల పెట్టుబడులు ఇప్పటికే రూ.3,950 కోట్లకు చేరుకున్నాయి.
సుమారు 395 కోట్ల ఈక్విటీ షేర్లను ప్రైవేటు పెట్టుబడిదారులకు కేటాయించినట్లు ఎస్ బ్యాంకు పేర్కొంది. ఒక్కో ఈక్విటీ షేరుకు రూ.10 ముఖ విలువ, రూ. 8 ప్రీమియంతో షేర్ ధరను లెక్కించనున్నట్లు తెలిపింది.
ఎస్బీఐకి కేటాయింపు...
ఎస్ బ్యాంకులో 49 శాతం వాటా కొనుగోలుకు సిద్ధమైన ఎస్బీఐకి.. 605 కోట్ల షేర్లను రూ.6,050 కోట్ల రూపాయలకు కేటాయించారు. ఎస్ బ్యాంక్ కోసం రిజర్వ్ బ్యాంకు ప్రతిపాదించిన పునరుజ్జీవ ప్రణాళిక కింద మార్చి 14 నుంచి మూడేళ్లు పూర్తయ్యే వరకు ఎస్బీఐ.. తన వాటాను 26 శాతానికి తగ్గించేందుకు వీలుండదు.
భారీ పెట్టుబడులు...
ఎస్ బ్యాంకులో ఇప్పటికే రూ.7,250 కోట్లు పెట్టుబడి పెట్టేందుకు ఎస్బీఐ నిర్ణయం తీసుకున్న విషయం తెలిసిందే. ఈ నేపథ్యంలోనే సెంట్రల్ ఎగ్జిక్యూటివ్ కమిటీ (ఈసీసీబీ) ఎస్ బ్యాంకులో 725 కోట్ల షేర్లను రూ.10 చొప్పున కొనుగోలు చేసేందుకు గురువారం ఆమోదం తెలిపింది.
పెట్టుబడుల వివరాలు..
- హెచ్‌డీఎఫ్‌సీ, ఐసీఐసీఐ బ్యాంకులు కూడా చెరో రూ.1,000 కోట్లు
- యాక్సిస్‌ బ్యాంక్ రూ.600 కోట్లు
- కోటక్‌ మహీంద్రా బ్యాంకు రూ.500 కోట్లు
- ఫెడరల్ బ్యాంకు, బంధన్‌ బ్యాంకు ఒక్కొక్కటి రూ.300 కోట్ల చొప్పున పెట్టుబడి పెట్టేందుకు సంసిద్ధతను వ్యక్తం చేశాయి.
మరోవైపు ఎస్ బ్యాంకుపై ఈ నెల 5న విధించిన మారటోరియాన్ని 18న ఎత్తివేయనున్నట్లు ఆర్బీఐ ఇప్పటికే ప్రకటించింది. దీని ప్రకారం ఆర్బీఐ ప్రతిపాదించిన ఎస్‌బ్యాంకు పునరుజ్జీవ ప్రణాళిక-2020 అమల్లోకి వస్తుంది.
మాజీ ఎస్బీఐ సీఎఫ్ఓ, ప్రస్తుత ఎస్ బ్యాంకు నిర్వాహకుడు ప్రశాంత్ కుమార్ సంస్థ మేనేజింగ్ డైరెక్టర్, సీఈఓగా బాధ్యతలు చేపట్టే అవకాశం ఉంది.
ఇదీ చూడండి:మదుపరులు ఏ షేర్లు కొంటే లాభదాయకం?
