ప్రముఖ వ్యాపారవేత్త, లిక్కర్ కింగ్ విజయ్మాల్యా బ్యాంకులకు ఓ బంపర్ ఆఫర్ ఇచ్చారు. తాను ఎగవేసిన రూ. 9 వేల కోట్లను తిరిగి తీసుకుని, తనపై ఉన్న కేసులు కొట్టేయాలని భారత ప్రభుత్వాన్ని కోరారు.
కరోనాపై పోరు కోసం భారత్ ప్రకటించిన రూ. 20 లక్షల కోట్ల ప్యాకేజ్పై ట్విట్టర్లో మాల్యా స్పందించారు.
''ప్రభుత్వం ఎంత కావాలంటే అన్ని నోట్లు ముద్రించుకోవచ్చు.. కానీ, నా లాంటి ఓ చిన్న చెల్లింపుదారుడు దేశీయ బ్యాంకులకు 100 శాతం బాకీలు తిరిగి చెల్లిస్తానంటే పట్టించుకోవట్లేదేంటీ? దయచేసి నా దగ్గర డబ్బులు స్వీకరించి, కేసు మూసేయండి."
-విజయ్ మాల్యా
గత ఫిబ్రవరీలోనూ బ్యాంకులకు ఇలాంటి ఆఫరే ఇచ్చారు మాల్యా. అయితే, బ్యాంకులు ఆయన మాటలను పట్టించుకోలేదు. జప్తు చేసిన మాల్యా ఆస్తులను తిరిగి ఇచ్చేందుకు ఈడీ ముందుకు రాలేదు.
మాల్యాను అప్పగించాలని భారత్... బ్రిటన్ ప్రభుత్వాన్ని కోరగా లండన్ కోర్టు ఇందుకు అంగీకరించింది. ఆ తీర్పును సవాలు చేస్తూ, బ్రిటిష్ కోర్టులో మాల్యా పిటిషన్ వేశారు.
కింగ్ ఫిషర్ ఎయిర్లైన్స్ అధిపతిగా భారత బ్యాంకుల నుంచి రూ.9 వేల కోట్లు అప్పుతీసుకున్న ఆయన తిరిగి చెల్లించనందుకు మనీలాండరింగ్ కేసులో చిక్కుకున్నారు.
ఇదీ చదవండి:రోజుకు 6 వేల మంది చిన్నారులకు ప్రాణగండం!
