ఆర్థికమంత్రి నిర్మలా సీతారామన్ మొదటిసారి ప్రవేశపెట్టిన బడ్జెట్ను అమెరికా కార్పొరేట్ వర్గాలు స్వాగతించాయి. ఈ బడ్జెట్ విదేశీ పెట్టుబడులను ఆకర్షించే విధంగా ఉందని ప్రశంసించాయి.
పెట్టుబడులకు ప్రోత్సాహం..
మోదీ ప్రభుత్వం ప్రవేశపెట్టిన ఈ బడ్జెట్ సానుకూల, నిర్మాణాత్మక సంస్కరణలు చేపట్టడానికి ఉపకరిస్తుందని యూఎస్ ఇండియా స్ట్రాటజిక్ అండ్ పార్టనర్షిప్ ఫోరమ్ అధ్యక్షుడు ముఖేశ్ అఘి పేర్కొన్నారు. భారత్ మార్కెట్ తలుపులు తెరిచి, అమెరికా సంస్థలు అక్కడ ఎక్కువ పెట్టుబడులు పెట్టడానికి ప్రోత్సహిస్తుందని అన్నారు. అదే సమయంలో దిగువ వర్గాల సంపదను పెంపొందిస్తుందని విశ్లేషించారు ముఖేశ్.
"మోదీ 2.0 ప్రభుత్వం ప్రవేశపెట్టిన బడ్జెట్ సమగ్రంగా ఉంది. అందులోని విధాన నిర్ణయాలు అమెరికా కంపెనీలకు ప్రోత్సాహకరంగా ఉన్నాయి. యాపిల్ లాంటి కంపెనీలకు ఇది మంచివార్త."
-ముఖేశ్ అఘి, యూఎస్ ఇండియా స్ట్రాటజిక్ అండ్ పార్టనర్షిప్ ఫోరమ్ అధ్యక్షుడు
సంస్కరణలు భేష్...
"మోదీ ప్రభుత్వ 2019-20 బడ్జెట్ సంస్కరణ దృక్పథంతో ఉండడం ఎంతో సంతోషాన్ని కలిగిస్తోంది."
-నిషా దేశాయ్ బిశ్వాల్, యూఎస్ ఇండియా బిజినెస్ కౌన్సిల్ అధ్యక్షురాలు
రైతుల ఆదాయం రెట్టింపు చేయడానికి, అనేక రంగాల్లో విదేశీ ప్రత్యక్ష పెట్టుబడులు ప్రోత్సహించడానికి తీసుకున్న క్రియాశీలక చర్యలు అభినందనీయమని బిశ్వాల్ పేర్కొన్నారు. బీమా మధ్యవర్తుల కోసం 100 శాతం ఎఫ్డీఐలను అనుమతించడానికి, ఎఫ్పీఐ పెట్టుబడి పరిమితులను పెంచడానికి తీసుకున్న చర్యలనూ స్వాగతించారు. ఈ సంస్కరణలకు యూఎస్ఐబీసీ మద్దతు ఉంటుందని బిశ్వాల్ అన్నారు.
ఉద్యోగాల సృష్టి
"2022 కల్లా అందరికీ ఇళ్లు నిర్మించి ఇస్తామన్న బడ్జెట్ ప్రతిపాదన వల్ల దిగువ తరగతి వారికి గృహ వసతి కలుగుతుంది. సిమెంట్, స్టీల్ పరిశ్రమల్లో ఉద్యోగాల సృష్టి జరుగుతుంది" అని ఇండియన్ ఛాంబర్ ఆఫ్ కామర్స్ అధ్యక్షుడు కరుణ్ రుషి అభిప్రాయపడ్డారు.
"నేను మరిన్ని గొప్ప సంస్కరణలను ఊహించాను. బదులుగా మౌలిక సదుపాయాల అభివృద్ధి, గ్రామీణ ప్రాంతాల్లో సామాజిక కార్యక్రమాల విస్తరణ, డిజిటల్ ఇండియా, మేక్ ఇన్ ఇండియా లాంటి కార్యక్రమాల కొనసాగింపును చూస్తున్నాను."
-రిక్ రోసో, సెంటర్ ఫర్ స్ట్రాటజిక్ అండ్ ఇంటర్నేషనల్ స్టడీస్
ఇదీ చూడండి:
