వాట్సాప్​లో కొత్త ఫీచర్ల సందడి.. అవేంటో తెలుసా?

ఎప్పటికప్పుడు కొత్త అప్​డేట్లు.. సరికొత్త ఫీచర్లు అందిస్తూ యూజర్లకు దగ్గరయ్యే వాట్సాప్ ఈ సారి భారీ ఎత్తున కొత్త ఫీచర్లు తేనుంది. ఇప్పటికే ఫింగర్​ ప్రింట్​, గ్రూప్ ప్రైవసీ ఫీచర్లు తెచ్చిన వాట్సాప్​.. త్వరలో డార్క్​మోడ్, బూమరాంగ్​ వంటి మరెన్నో ఫీచర్లు తీసుకురానుంది. వాటికి సంబంధించిన పూర్తి వివరాలు మీ కోసం.

వాట్సాప్​.. స్మార్ట్​ఫోన్ వాడుతున్న వారిలో ఈ పేరు తెలియని వారు ఉండరంటే అతిశయోక్తికాదు. ప్రపంచ వ్యాప్తంగా 100 కోట్ల మందికి పైగా ఈ యాప్​ను వాడుతున్నారు. కేవలం మన దేశంలోనే 40 కోట్ల మంది వాట్సాప్​ను వినియోగిస్తున్నారు. ఈ యాప్​ ఇంత ఎక్కువ మందికి చేరువ కావడానికి ప్రధాన కారణం.. అందులో ఉండే ఫీచర్లు. యూజర్లను ఆకర్షించేందుకు వాట్సాప్​ అదే తరహాలో ఎప్పటికప్పుడు కొత్త కొత్త అప్​డేట్లు తెస్తుంది. తాజాగా భారీ ఎత్తున కొత్త ఫీచర్లు తెచ్చేందుకు సిద్ధమైంది ఫేస్​బుక్​కు చెందిన మెసెంజర్ దిగ్గజం​. ఈ సారి తీసుకొచ్చే ఫీచర్లపై భారీ అంచనాలున్నాయి. మరి ఆ ఫీచర్లేంటి? వాటి ఉపయోగమెంత? అనే విషయాలు మీ కోసం.

డార్క్​ మోడ్​..

వాట్సాప్​ ఎప్పటి నుంచో ఊరిస్తున్న కొత్త ఫీచర్​.. డార్క్​ మోడ్​. ఈ ఫీచర్​ అందుబాటులోకి వస్తే.. వాట్సాప్​ ఇంటర్​ఫేస్​​ సహా.. అన్ని ఆప్షన్లు కేవలం లేత రంగుల్లోకి మార్చుకునే సౌలభ్యం ఉండనుంది. దీని ద్వారా రాత్రి పూట వాట్సాప్​ వాడేందుకు ఎక్కువ సౌకర్యంగా ఉంటుంది. మరీ ముఖ్యంగా ఫోన్​​ ఛార్జింగ్​ ఎక్కువసేపు వస్తుంది. ప్రస్తుతం బీటా వెర్షన్ యూజర్లకు ఈ సదుపాయం అందుబాటులో ఉంది. త్వరలోనే యూజర్లందరికీ ఈ ఫీచర్​ అందుబాటులోకి రానుంది.

బూమరాంగ్ ఫీచర్​..

సామాజిక మాధ్యమాల్లో ప్రస్తుతం నడుస్తున్న ట్రెండ్​ బూమరాంగ్. ఏదైన ఫొటోను సరదాగా స్వల్ప నిడివిగల వీడియోగా మార్చడమే ఈ ఫీచర్​లో ఉన్న సౌకర్యం. ప్రస్తుతం ఫేస్​బుక్​కు చెందిన ఇన్​స్టాగ్రామ్​లో ఈ ఫీచర్​ తెగ హల్​చల్​ చేస్తోంది. అలాంటి ఫీచర్​ను తమ వినియోగదారులకు అందించాలని వాట్సాప్ భావిస్తోంది. ఇందులో భాగంగా ఇప్పటికే ఐఓఎస్​ యూజర్లకు ఈ ఫీచర్​ను అందుబాటులోకి తెచ్చింది. ఆండ్రాయిడ్​ యూజర్లకు త్వరలోనే అందుబాటులోకి వచ్చే వీలుంది.

డిలీట్​ ఆటోమేటిక్​..

వాట్సాప్ యూజర్లు అవతలి వ్యక్తికి పంపే సందేశాలు కొంత సేపటి తర్వాత వాటంతటవే డిలీట్​ అయ్యేలా ఓ ఫీచర్​ను తీసుకువచ్చేందుకు వాట్సాప్ కృషి చేస్తున్నట్లు తెలుస్తోంది.
ఈ ఫీచర్ అందుబాటులోకి వస్తే.. ఒక వాట్సాప్ యూజర్​ మరో వాట్సాప్ యూజర్​కు సందేశాలు పంపే ముందు తన మెసేజ్​ అవతలి వ్యక్తికి ఎంత సేపు కనిపించాలి అనేది ముందుగానే నిర్ణయించొచ్చు. ఇలా ఈ ఫీచర్​ను ఉపయోగించి పంపిన సందేశాలు 5 సెకన్ల నుంచి గంట వ్యవధిలో వాటంతట అవే డిలీట్​ అవుతాయి. తాత్కాలిక అవసరాలకు పంపే సందేశాలకు ఈ ఫీచర్​ ఎంతో ఉపయోగపడనుంది.

ప్రస్తుతం 'డిలీట్​ బోత్'​ అనే ఫీచర్​ ఇంచుమించు ఇలాంటి సదుపాయాలతో అందుబాటులో ఉంది. ఈ సదుపాయం ద్వారా ఒకరికి పంపాల్సిన సందేశం వేరొకరికి పంపినప్పుడు.. లేదా ఏవైనా పొరపాట్లు ఉంటే ఆ సందేశాన్ని పూర్తిగా డిలీట్​ చేయొచ్చు. గరిష్ఠంగా.. సందేశం పంపిన గంటలోపు డిలీట్ ​బోత్​ సదుపాయాన్ని వినియోగించే అవకాశముంది. ముఖ్యంగా యూజర్ మాన్యువల్​గా ఈ సదుపాయం వినియోగించాల్సి ఉంటుంది.

ఇటీవలి కొత్త ఫీచర్లు ఇవే..

వాట్సాప్ ఇప్పటికే.. ఫింగర్​ప్రింట్​, ఫేస్​ అన్​లాక్​ ఫీచర్​ను అందుబాటులోకి తెచ్చింది. దీనితో పాటు అనవసర గ్రూపుల్లో.. గుర్తు తెలియని వారు మిమ్మల్ని చేర్చేందుకు వీలు లేకుండా సెక్యూరిటీ ఫీచర్​ను తెచ్చింది. దీని ద్వారా మీరు ఎంపిక చేసుకున్న వారు మాత్రమే మిమ్మల్ని గ్రూపుల్లో చేర్చే వీలుండనుంది.

ఇదీ చూడండి: ఆర్​కామ్​ డైరెక్టర్​ పదవికి అనిల్ అంబానీ రాజీనామా