అప్పుల్లో కూరుకుపోయిన ప్రభుత్వ రంగ విమానయాన సంస్థ ఎయిర్ ఇండియా ఈ ఏడాది చివరి నాటికి లేదా వచ్చే ఏడాది ప్రారంభం నుంచే టాటా గ్రూప్ పరిధిలోకి వెళ్లనున్నట్లు తెలుస్తోంది.
టాటాకే ఎందుకు?
ఎయిర్ ఇండియా కొనుగోలుకు బిడ్లు సమర్పించేందుకు ఆగస్టు 31తో గడువు ముగియనుంది. మరోసారి గడువు పెంచే యోచన లేదని ప్రభుత్వం ఇప్పటికే స్పష్టం చేసింది. అయితే ప్రస్తుతం ఎయిర్ ఇండియా కొనుగోలుకు మొగ్గు చూపుతున్న ఏకైక సంస్థ టాటా గ్రూప్ మాత్రమే. దీనితో టాటా గ్రూప్ బిడ్ సమర్పిస్తే (గడువు లోపు ఇతర సంస్థల నుంచి పోటీ రాకపోతే) ఎయిర్ ఇండియా పగ్గాలు అప్పగించడం లాంఛనం కానుంది.
ఇప్పటికే కరోనా కారణంగా విమానయాన రంగం తీవ్ర సంక్షోభంలో కూరుకుపోయింది. ఇలాంటి సమయాల్లో ఏ సంస్థ కూడా ఎయిర్ ఇండియా కొనుగోలుకు ఆసక్తి చూపడం లేదు. దీనితో టాటాకు ఎయిర్ ఇండియా కొనుగోలు విషయంలో పోటీ ఉండే అవకాశం తక్కువే.
టాటా గ్రూప్ బిడ్ను ప్రభుత్వం ఆమోదిస్తే.. 90 రోజుల వ్యవధిలోపు ఎయిర్ ఇండియాను టాటాకు బదిలీ చేసే అవకాశం ఉంది. నవంబర్ 30 లేదా డిసెంబర్ 31తో బదిలీ ప్రక్రియ పూర్తవ్వచ్చని అంచనా. అదే జరిగితే 2021 జనవరి 1 నుంచి ఎయిర్ఇండియా కార్యకలాపాలు టాటా గ్రూప్ నిర్వహించొచ్చు.