జాతీయ కంపెనీ లా అప్పీలేట్ ట్రైబ్యునల్(ఎన్సీఎల్ఏటీ) ఉత్తర్వులపై.. టాటా సన్స్, సైరస్ మిస్త్రీ దాఖలు చేసిన పరస్పర అప్పీళ్లపై సుప్రీం కోర్టు శుక్రవారం తీర్పు వెలువరించనుంది. ప్రధాన న్యాయమూర్తి జస్టిస్ ఎస్ఏ బోబ్డే నేతృత్వంలోని ధర్మాసనం తీర్పు ఇవ్వనుంది.
సైరస్ మిస్త్రీని టాటా సన్స్ ఎగ్జిక్యూటివ్‌ ఛైర్మన్గా తిరిగి నియమిస్తూ జారీ చేసిన ఎన్సీఎల్ఏటీ ఆదేశాలపై టాటాసన్స్, సైరస్ ఇన్వెస్ట్‌మెంట్స్‌ పరస్పరం పిటిషన్లు వేశాయి. నాడు విచారణ చేపట్టిన జస్టిస్ ఎస్ఏ బోపన్న, జస్టిస్ వీ రామ సుబ్రమణియన్లతో కూడిన ధర్మాసనం.. గతేడాది డిసెంబర్ 17న ఈ తీర్పును రిజర్వు చేసింది.
ఇదీ చదవండి:టాటాసన్స్- మిస్త్రీ కేసు: ఎన్సీఎల్ఏటీ తీర్పుపై సుప్రీం స్టే
వాదనలు ఇలా..
2016 అక్టోబర్లో టాటా సన్స్ ఛైర్మన్ పదవి నుంచి సైరస్ మిస్త్రీని తొలగించడం కంపెనీల చట్ట నిబంధనలను, ఆర్టికల్స్‌ ఆఫ్‌ అసోసియేషన్‌ను ఉల్లంఘించడమేనని షాపూర్జీ పల్లోంజీ(ఎస్‌పీ) గ్రూప్‌.. డిసెంబర్ 17న కోర్టుకు తెలిపింది. అయితే.. మిస్త్రీని తొలగించడం తమ హక్కులకు లోబడే జరిగిందని.. ఈ విషయంలో తాము ఎలాంటి తప్పూ చేయలేదని టాటా సన్స్ సమర్థించుకుంది.
ఈ కేసులో గతేడాది జనవరి 10న సుప్రీం కోర్టులో టాటా సన్స్కు ఉపశమనం లభించింది. 2019 డిసెంబరు 18న మిస్త్రీని తిరిగి కార్య నిర్వాహక ఛైర్మన్గా నియమిస్తూ అప్పీలేట్ ట్రైబ్యునల్(ఎన్సీఎల్ఏటీ) ఇచ్చిన తీర్పుపై అత్యున్నత న్యాయస్థానం స్టే విధించింది.
వివాదం ఏమిటంటే..
రతన్ టాటా తర్వాత టాటా సన్స్ ఛైర్మన్గా సైరస్ మిస్త్రీ 2012లో నియమితులయ్యారు. కానీ నాలుగేళ్ల తర్వాత అంతర్గత విభేదాల వల్ల ఆయన్ను పదవి నుంచి తొలగించి.. రతన్ టాటా తాత్కాలికంగా ఆ బాధ్యతలు స్వీకరించారు. దీనితో తనను పదవి నుంచి తప్పించడాన్ని సవాలు చేస్తూ.. మిస్త్రీ కోర్టును ఆశ్రయించారు.
ఇదీ చదవండి: 'ఇక నుంచి డ్రైవింగ్ టెస్ట్ మరింత కఠినం
'
