సానుకూల చర్చలపైనే ఆశలు- లేదంటే నష్టాలే

అమెరికా-చైనా వాణిజ్య చర్చలపై అనుమానాల మధ్య స్టాక్​ మార్కెట్లు నష్టాల్లో ట్రేడవుతున్నాయి. సెన్సెక్స్​ 100 పాయింట్లు పతనమైంది. నిఫ్టీ 30 పాయింట్లు తగ్గింది.

వాణిజ్య యుద్ధ భయాలు స్టాక్​ మార్కెట్లను బెంబేలెత్తిస్తున్నాయి.బొంబాయి స్టాక్​ ఎక్స్చేంజి సూచీ-సెన్సెక్స్ ప్రస్తుతం 100 పాయింట్లు కోల్పోయి.. 37,700 వద్ద ట్రేడవుతోంది. జాతీయ స్టాక్​ ఎక్స్చేంజి సూచీ-నిఫ్టీ 30 పాయింట్ల నష్టానికి 11,320 వద్ద ట్రేడింగ్​ సాగిస్తోంది.

ఇవీ కారణాలు

అమెరికా-చైనా వాణిజ్య యుద్ధానికి తెర దించే దిశగా 11వ దశ చర్చలు నేటి నుంచి రెండ్రోజులు జరగనున్నట్లు అధికారికంగా తేలింది. వాషింగ్టన్​లో జరుగనున్న ఈ చర్చలు కీలకంగా మారాయి.

తమ వస్తువులపై అమెరికా సుంకాల పెంపు అనివార్యమైతే.. తాము కూడా దీటుగా సమాధానమిస్తామని చైనా హెచ్చరించింది. ఇరు దేశాల మధ్య చర్చలు ఏమేరకు సఫలం అవుతాయోనన్న అనుమానాల మధ్య స్టాక్ మార్కెట్లు నష్టాల్లో ట్రేడవుతున్నాయి.

ఈ చర్చల్లో ఎలాంటి పురోగతి లేకపోతే స్టాక్ మార్కెట్లకు మరిన్ని నష్టాలు తప్పవంటున్నారు నిపుణులు.

లాభానష్టాల్లోనివే

సెన్సెక్స్​లో హీరో మోటార్స్​, ఇన్ఫోసిస్​, మారుతి, ఎల్​ అండ్​ టీ, బజాజ్ ఆటో, భారతీ ఎయిర్​టెల్​ షేర్లు స్వల్ప లాభాల్లో ట్రేడవుతున్నాయి.

రిలయన్స్​ షేర్లు నేడు దాదాపు 3 శాతం క్షీణించాయి. ఎన్​టీపీసీ, యస్​ బ్యాంకు, పవర్​ గ్రిడ్, ఎం అండ్ ఎం, హెచ్​సీఎల్​ టెక్​ షేర్లు నష్టాలతో ట్రేడవుతున్నాయి.

రూపాయి, ముడి చమురు

సెషన్ ప్రారంభంలో రూపాయి 16 పైసలు తగ్గింది. డాలర్​తో రూపాయి మారకం విలువ ప్రస్తుతం 69.87 వద్ద ట్రేడవుతోంది.

ముడి చమురు ధరల బ్రెంట్​ సూచీ 0.75 శాతం తగ్గి.. బ్యారెల్​ ముడి చమురు ధర 69.84 డాలర్ల వద్ద కొనసాగుతోంది.