ఉరకలెత్తిన ఉత్సాహం.. కొత్త రికార్డుల దిశగా మార్కెట్లు

వృద్ధికి ఊతమందించే దిశగా కేంద్రం మరిన్ని ప్రోత్సాహకాలు అందిస్తుందనే ఆశతో స్టాక్ మార్కెట్లు నేడు లాభాలతో ముగిశాయి. సెన్సెక్స్ 220 బలపడి.. తిరిగి కీలక 40 వేల మార్క్​ను అందుకుంది. నిఫ్టీ 57 పాయింట్లు పెరిగింది.

స్టాక్ మార్కెట్లు నేడు లాభాలతో ముగిశాయి. డివిడెండ్ పంపిణీ సుంకం (డీడీటీ) రద్దు, దీర్ఘకాలిక మూలధన లాభాలపై పన్ను(ఎల్​టీసీజీ), స్వల్పకాలిక మూలధన లాభాలపై సుంకం(ఎస్​టీసీజీ) సహా పలు ఇతర సుంకాలను రద్దు చేసే దిశగా కేంద్రం అడుగులు వేస్తోందన్న వార్తలు మదుపర్లలో ఉత్సాహం నింపాయి. వృద్ధికి ఊతమందించే దిశగా ఈ ప్రోత్సాహకాలు ఇస్తుందన్న అంచనాలతో భారీగా కొనుగోళ్లు జరపడం నేటి లాభాలకు ప్రధాన కారణం.

వీటికి తోడు టెలికాం రంగం ఎదుర్కొంటున్న ఆర్థిక ఒత్తిడిని అధిగమించేందుకు తీసుకోవాల్సిన చర్యలపై కేంద్రం.. కేబినెట్‌ సెక్రటరీ నేతృత్వంలో కూడిన ఓ కమిటీని ఏర్పాటు చేసింది. ఈ ప్రకటనతో టెలికాం షేర్లు భారీగా లాభాలను నమోదు చేశాయి. నేటి లాభాలకు ఇదీ ఓ కారణమైంది.

బొంబాయి స్టాక్​ ఎక్స్చేంజి సూచీ-సెన్సెక్స్ 220 పాయింట్లు బలపడింది. చివరకు 40,052 వద్ద స్థిరపడింది. జాతీయ స్టాక్​ ఎక్స్చేంజి సూచీ-నిఫ్టీ 57 పాయింట్లు వృద్ధి చెంది..11,844 వద్దకు చేరింది.

ఇంట్రాడే సాగిందిలా..

సెన్సెక్స్​ 40,178 పాయింట్ల గరిష్ఠాన్ని తాకగా.. 39,805 పాయింట్ల కనిష్ఠాన్ని నమోదు చేసింది.
నిఫ్టీ నేడు 11,884 పాయింట్ల అత్యధిక స్థాయి.. 11,784 పాయింట్ల అత్యల్ప స్థాయిల మధ్య కదలాడింది.

లాభనష్టాల్లోనివి ఇవే..

ఎస్​బీఐ 3.37 శాతం, టీసీఎస్ 2.63 శాతం, ఐటీసీ 2.43 శాతం, భారతీ ఎయిర్​టెల్ 2.31 శాతం​, సన్​ఫార్మా 1.90 శాతం, ఇన్ఫోసిస్ 1.51 శాతం​, బజాజ్ ఆటో షేర్లు 1.30 శాతం లాభాలతో ముగిశాయి.

ఎస్​ బ్యాంకు 2.41 శాతం, మారుతీ 2.13 శాతం, ఇండస్​ఇండ్​ బ్యాంకు 1.66 శాతం, ఐసీఐసీఐ బ్యాంకు 1.37 శాతం, బజాజ్ ఫినాన్స్ 1.32 శాతం, ఓఎన్​జీసీ 1.09 శాతం నష్టాలను మూటగట్టుకున్నాయి.

ఇదీ చూడండి: వచ్చే ఏడాది శాంసంగ్​ మడత ఫోన్-2.0!