ఆక్సిజన్ సరఫరాలో 'ఉక్కు' సంకల్పం

దేశంలో మెడికల్​ ఆక్సిజన్​ కొరతకు చెక్​ పెట్టేందుకు స్టీల్​ కంపెనీలు ఉక్కు సంకల్పంతో ముందుకు సాగుతున్నాయి. గత ఏడాది సెప్టెంబర్​ నుంచి 2021 ఏప్రిల్ 22 వరకు దేశవ్యాప్తంగా ఉన్న పలు ప్రభుత్వ, ప్రైవేటు స్టీల్ సంస్థలు 1.43 మెట్రిక్​ టన్నుల లిక్విడ్ మెడికల్ ఆక్సిజన్​ను ఉత్పత్తి చేసి.. వివిధ రాష్ట్రాలకు సరఫరా చేసినట్లు అధికారిక డేటాలో వెల్లడైంది.

దేశవ్యాప్తంగా ఆక్సిజన్​ సరఫరాలో ఉక్కు ఉత్పత్తి సంస్థలు ముందు వరుసలో ఉన్నాయి. పలు ప్రభుత్వ, ప్రైవేటు సంస్థలు.. గత ఏడాది నుంచే వివిధ రాష్ట్రాలకు ఆక్సిజన్​ సరఫరా చేస్తున్నాయి.

అధికారిక డేటా ప్రకారం.. గత ఏడాది సెప్టెంబర్ నుంచి 2021 ఏప్రిల్ 22 వరకు 1,43,876.283 మెట్రిక్ టన్నుల లిక్విడ్ మెడికల్ ఆక్సిజన్ సరఫరా చేశాయి ఉక్కు ఉత్పత్తి సంస్థలు.

మెడికల్ ఆక్సిజన్​ సరఫరా చేసిన ప్రైవేటు కంపెనీల్లో.. టాటా స్టీల్, ఆర్సెలార్​ మిత్తల్​ నిప్పన్​ స్టీల్​ ఇండియా(ఏఎంఎన్​ఎస్​), జేఎస్​డబ్ల్యూ స్లీల్​, జిందాల్​ స్టీల్​ & పవర్ లిమిటెడ్​​, వేదాంత వంటివి ప్రధానంగా ఉన్నాయి.

స్టీల్ అథారిటీ ఆఫ్ ఇండియా(సెయిల్​), రాష్ట్రీయ ఇస్పాత్​ నిగామ్​ లిమిటెడ్​ (ఆర్​ఐఎన్​ఎల్​) వంటి ప్రభుత్వ రంగ సంస్థలు మెడికల్ ఆక్సిజన్ ఉత్పత్తి,​ సరఫరాలో భాగస్వామ్యమయ్యాయి.

ఆయా సంస్థలు ఉత్పత్తి చేసిన ఆక్సిజన్​ను.. మహారాష్ట్ర, ఉత్తర్ ప్రదేశ్, ఆంధ్ర ప్రదేశ్​, ఒడిశా, బంగాల్, బిహార్​, జార్ఖండ్, దిల్లీ, మధ్య ప్రదేశ్ వంటి రాష్ట్రాలకు అధికంగా సరఫరా చేశాయి.

టాటా స్టీల్​ ఒంటరిగా.. వివిధ రాష్ట్రాలకు రోజుకు 300 టన్నుల లిక్విడ్ మెడికల్ ఆక్సిజన్ సరఫరా చేస్తున్నట్లు ఇటీవల ప్రకటించింది.

ప్రభుత్వ రంగ సంస్థలైన సెయిల్, ఆర్​ఐఎన్​ఎల్​​ వరుసగా రోజుకు 600 టన్నులు, 100 టన్నుల చొప్పున మెడికల్​ ఆక్సిజన్​ సరఫరా చేస్తున్నట్లు తెలిపాయి.

ప్రభుత్వ అభ్యర్థన మేరకు మెడికల్ ఆక్సిజన్​ను సరఫరాలో చేస్తున్న సహాయానికి గానూ.. ఆయా సంస్థలన్నింటికీ కృతజ్ఞతలు తెలిపారు ఉక్కు పరిశ్రమ మంత్రి ధర్మేంద్ర ప్రధాన్​.

ఇదీ చదవండి:'యువతరం ఓటు విద్యుత్​ వాహనాలకే'