దసరా వేళ ఇన్ని లక్షల స్మార్ట్​ఫోన్లు కొనేశారా...?

525...! ఫ్లిప్​కార్ట్​, అమెజాన్​లో నిమిషానికి అమ్ముడైన షియోమి ఫోన్లు, టీవీల సంఖ్య. పండుగ సేల్​ సందర్భంగా ఒక్క బ్రాండ్ విక్రయాలే ఈ స్థాయిలో ఉంటే... మిగిలిన దిగ్గజ సంస్థల సంగతేంటి..? రియల్​మీ, సామ్​సంగ్​, యాపిల్​ ఫోన్లు ఎన్ని లక్షలు అమ్ముడయ్యాయి?

ఆర్థిక మాంద్యం వస్తుందని అందరూ భయపడుతున్నారు. వాహన, బిస్కెట్​ రంగాల వారు సంక్షోభంలో కొట్టుమిట్టాడుతున్నారు. కానీ... స్మార్ట్​ఫోన్​ తయారీదారులు మాత్రం దసరాకు ముందే దీపావళి జరుపుకున్నారు. అమెజాన్ గ్రేట్ ఇండియన్ ఫెస్టివల్, ఫ్లిప్​కార్ట్ బిగ్​ బిలియన్​ డే సేల్​ పేరిట 6 రోజులు ప్రత్యేక అమ్మకాలతో అదరగొట్టారు.

స్మార్ట్​ఫోన్ల అమ్మకాలు ఈ ఏడాది ఏకంగా 15 రెట్లు పెరిగాయి. సేల్స్​లో సామ్​సంగ్, వన్ ప్లస్, యాపిల్, షియోమి, వివో ఫోన్లు దూసుకెళ్లాయి.

"వన్ ప్లస్ ఫోన్లు రూ.700 కోట్ల అమ్మకాలు జరిగాయి. గతేడాది గ్రేట్​ ఇండియన్ ఫెస్టివల్​తో పోల్చితే సామ్​సంగ్ ఫోన్లు 5 రెట్లు ఎక్కువగా వినియోగదారుల చేతుల్లోకి చేరాయి. సామ్​సంగ్ ఎం సిరీస్, ఎ, నోట్ 9 బాగా అమ్ముడయ్యాయి."

-అమెజాన్.ఇన్ ప్రకటన

షియోమి..

ఎంఐ టీవీలు సహా 53 లక్షల తమ ఉత్పత్తులు అమెజాన్​లో అమ్ముడయ్యాయని తెలిపింది షియోమి. ఈ లెక్కన నిమిషానికి 525 ఫోన్లను వినియోగదారులు బుక్​ చేసుకున్నారని ఆ సంస్థ ప్రకటించింది. రెడ్​మీ నోట్​ 7 సిరీస్ మొబైళ్లు 38 లక్షలు అమ్ముడయ్యాయని ఫ్లిప్​కార్ట్ వెల్లడించింది.

రియల్​మీ

మరో చైనా మొబైల్ సంస్థ రియల్​మీ 22 లక్షల స్మార్ట్​ ఫోన్ హ్యాండ్​సెట్లను విక్రయించింది. ఆఫర్ సమయంలో రూ. 300 కోట్ల తగ్గింపుతో మొబైళ్లను వినియోగదారులకు అందుబాటులో ఉంచిందీ వ్యాపార సంస్థ. రియల్​ మీ5, 3 ప్రో, సీ2 వంటి ఫోన్లు అతితక్కువ ధరలకు వినియోగదారులను చేరాయి.

"తక్కువ సమయంలోనే ఫ్లిప్​కార్ట్​లో నెంబర్​ 1 గా నిలవడం ద్వారా రియల్​మీ తన సత్తా చాటుకుంది. తక్కువ ధర, మంచి నాణ్యతతో అందిస్తున్న రియల్​మీ.. ఎక్కువగా ఎంచుకున్న ఫోన్లలో ఒకటిగా నిలిచింది."

-మాధవ్ సేఠ్, రియల్​ మీ ఇండియా సీఈఓ

సామ్​సంగ్..

మడత ఫోన్ల సిరీస్​లో 1600 గెలాక్సీ ఫోల్డ్ ఫోన్లు ముందస్తుగా బుక్ చేసుకున్నారని సంస్థ తెలిపింది. రూ.1,64, 999 విలువైన ఈ ఫోన్​కు ఇప్పటికే పూర్తి ధరను చెల్లించారని పేర్కొంది. అక్టోబర్ 20 నుంచి ఈ ఫోన్లను వినియోగదారులకు చేరవేస్తామని వెల్లడించింది.

అక్టోబర్ 27న జరగనున్న పాన్ ఇండియా కార్యక్రమానికి ముందు రూ. 3వేల కోట్ల వ్యాపారాన్ని అందుకోవాలని లక్ష్యంగా పెట్టుకుందీ వ్యాపార సంస్థ.

యాపిల్..

యాపిల్ సంస్థ ఐఫోన్ 11 సిరీస్​కు ఈ సీజన్లో మంచి డిమాండ్ ఉంది. సాధారణంగా నెల రోజుల్లో విక్రయమయ్యే సంఖ్యతో సమానంగా యాపిల్ స్మార్ట్​ వాచీలు ఫ్లిప్​కార్ట్ బిగ్​ బిలియన్ డేస్ ప్రారంభమైన ఆరు నిమిషాలకే అమ్ముడైనట్లు ఆ సంస్థ తెలిపింది.

ఇదీ చూడండి: గుడ్​ న్యూస్​: ఎస్​బీఐ డెబిట్​ కార్డులపై ఇక ఈఎంఐ సౌకర్యం