2022 నాటికి కరోనా వ్యాక్సిన్​.. సీరం సంస్థ ప్రకటన

కరోనా వ్యాక్సిన్​పై పుణె కేంద్రంగా పని చేస్తున్న సీరమ్​ ఇన్​స్టిట్యూట్ ఆఫ్ ఇండియా కీలక ప్రకటన చేసింది. మరో ఆరు నెలల్లో మానవుడిపై కరోనా వ్యాక్సిన్​ను పరీక్షించే అవకాశమున్నట్లు తెలిపింది. 2022 నాటికి ఈ వ్యాక్సిన్ పూర్తి స్థాయిలో అందుబాటులోకి రావచ్చని పేర్కొంది.

ప్రాణాంతక కరోనా వైరస్​ ప్రపంచాన్ని వణికిస్తున్న నేపథ్యంలో చాలా కంపెనీలు ఔషధాన్ని కనుగొనేందుకు తీవ్రంగా కృషి చేస్తున్నాయి. ఇలాంటి సమయంలో భారత్​కు చెందిన సీరమ్​ ఇన్​స్టిట్యూట్ ఆఫ్ ఇండియా (ఎస్​ఐఐ) కరోనా వైరస్​ వ్యాక్సిన్​పై కీలక ప్రకటన చేసింది. 2022 నాటికి వ్యాక్సిన్​ను అందుబాటులోకి తెచ్చేందుకు కృషి చేస్తున్నట్లు వెల్లడించింది.

మానవుడిపై పరీక్ష

కరోనా వైరస్​ వ్యాక్సిన్​ కోసం అమెరికాకు చెందిన బయోటెక్నాలజీ సంస్థ కోడాజెనిక్స్​తో కలిసి పుణెలో ఉన్న ఎస్​ఐఐ కృషి చేస్తోంది. మరో ఆరు నెలల్లో మానవుడిపై ఈ వ్యాక్సిన్​ పరీక్షలు నిర్వహించే అవకాశముందని ఈ సంస్థ పేర్కొంది.

రూ.300 కోట్లతో ప్రాజెక్టు

మానవాళికి ముప్పుగా మారిన కరోనా వైరస్​ సోకి ఇప్పటికే వేలాది మంది మరణించారు. వైరస్ సోకకుండా ముందస్తు జాగ్రత్త తీసుకోవడం ఇప్పుడు తప్పనిసరిగా మారింది. అందుకోసమే వ్యాక్సిన్ తయారీపై దృష్టి సారించినట్లు సంస్థ ప్రతినిధులు తెలిపారు. రూ.300 కోట్ల వ్యయంతో ఈ ప్రాజెక్టును ప్రారంభించినట్లు పేర్కొన్నారు.

ప్రపంచంలోనే అతిపెద్ద వ్యాక్సిన్​ తయారీ సంస్థ సీరమ్.

ఇదీ చూడండి:విమానాల్లో క్రికెట్ ప్రత్యక్ష ప్రసారం.. ఎప్పట్నుంచో తెలుసా?