రెండో త్రైమాసికంలో ఎస్​బీఐ లాభాలు అదుర్స్​

ప్రస్తుత ఆర్థిక సంవత్సరం రెండో త్రైమాసికంలో ఎస్​బీఐ రూ.3,375 కోట్ల ఏకీకృత నికర లాభాన్ని ప్రకటించింది. ఇదే సమయంలో ఎస్​బీఐ గ్రూపు పూర్తి ఆదాయం రూ. 89,348 కోట్లకు పెరగడం గమనార్హం.

ప్రభుత్వ రంగ బ్యాంకింగ్ దిగ్గజం భారతీయ స్టేట్ బ్యాంక్​ (ఎస్​బీఐ) ప్రస్తుత ఆర్థిక సంవత్సరం రెండో త్రైమాసికంలో భారీ లాభాలు నమోదు చేసింది. 2019 సెప్టెంబర్​తో ముగిసిన ప్రస్తుత ఆర్థిక సంవత్సర రెండో త్రైమాసికంలో బ్యాంకు ఏకీకృత నికరలాభం ఆరింతలు వృద్ధి చెంది రూ. 3,375.40 కోట్లను ఆర్జించింది. బ్యాంకు నికర లాభం రూ. 576.46 కోట్లుగా ఉంది.

ఇదే సమయంలో ఎస్​బీఐ గ్రూపు పూర్తి ఆదాయం రూ.89,347.91 కోట్లకు పెరిగింది. 2018-19 రెండో త్రైమాసికంలో ఎస్​బీఐ ఆదాయం రూ.79,302.72 కోట్లుగా ఉంది.

2019-20 రెండో త్రైమాసికంలో ఎన్​పీఏలు 7.19 శాతానికి, నికర నిరర్ధక ఆస్తులు, మొండి బకాయిలు 2.79 శాతానికి తగ్గినట్లు ఎస్​బీఐ పేర్కొంది. గత ఆర్థిక సంవత్సరం ఇదే సమయంలో బ్యాంకు నిరర్ధక ఆస్తులు 9.95 శాతంగా, నికర నిరర్ధక ఆస్తులు 4.84 శాతంగా ఉన్నాయి.

భారీ లాభాల ప్రకటనతో స్టాక్​ మార్కెట్లో ఎస్​బీఐ షేరు విలువ 7 శాతానికి పైగా పెరిగింది. ప్రస్తుతం ఒక షేరు విలువ రూ. 281 దాటింది.