ఉచిత కాల్స్, తక్కువ ధరకే డేటా అందిస్తూ దేశవ్యాప్తంగా సంచలనం సృష్టించిన జియో.. ఇక నుంచి కాల్ ఛార్జీలు వసూలు చేయనున్నట్లు ఇటీవలే ప్రకటించింది. టెలికాం సంస్థల ఇంటర్కనెక్ట్ యూసేజ్ ఛర్జ్ (ఐయూసీ) కింద నిమిషానికి 6 పైసలు ఛార్జ్ చేయనున్నట్లు తెలిపింది.
ఐయూసీ ఛార్జీలు విధిస్తున్నట్లు జియో ప్రకటించటాన్ని అదునుగా తీసుకున్న ఇతర నెట్వర్క్లు ఎయిర్టెల్, వొడాఫోన్-ఐడియా వంటివి సామాజిక మాధ్యమాల వేదికగా ట్రోల్ చేస్తున్నాయి. జియో నుంచి తమ నెట్వర్క్లోకి వచ్చేయండంటూ ట్విట్టర్ వేదికగా పలు పోస్టులు పెట్టాయి.
ఐయూసీ ఛార్జీలపై ఇతర నెట్వర్క్లు చేస్తోన్న రాద్ధాంతానికి దిమ్మదిరిగే షాక్ ఇచ్చింది రిలయన్స్ జియో. ట్రాయ్ నిబంధనల మేరకు ఇతర నెట్వర్క్లకు రూ.13,500 కోట్లు చెల్లించాల్సి వచ్చందని పేర్కొంది. నిమిషానికి 6 పైసలు వసూలు చేయాల్సి వస్తోంది ఇతర టెలికాం ఆపరేటర్ల కారణంగానేనని వివరించింది. ఎయిర్టెల్ను 'ఎయిర్ టోల్' అంటూ పరోక్షంగా విమర్శలు గుప్పించింది. వొడాఫోన్-ఐడియాపైనే ఇలాంటి మాటల తూటాలే సంధించింది.
ప్రత్యర్థుల్ని విమర్శించే పోస్టుల్ని ఆయా సంస్థల థీమ్ కలర్తోనే రూపొందించింది జియో. దీనిపై ఎయిర్టెల్ సరదాగా స్పందించింది. 'మా థీమ్ కలర్లో నువ్వు చాలా బాగున్నావ్' అంటూ జియో ట్వీట్కు రిప్లై ఇచ్చింది.
ఇదీ చూడండి:అదానీ గ్యాస్లో 37.4 శాతం వాటా కొనుగోలు!
