'ప్రపంచంలో అతిపెద్ద అన్నదాన కార్యక్రమం రిలయన్స్​దే'

ప్రపంచంలో మరే కార్పొరేట్ సంస్థ చేపట్టనంతటి పెద్ద అన్నదాన కార్యక్రమాన్ని తాము నిర్వహిస్తున్నట్లు తెలిపారు రిలయన్స్ ఫౌండేషన్ సారథి నీతా అంబానీ. కరోనా సంక్షోభంలో ప్రజలకు అండగా నిలిచేందుకు తమ సంస్థలు అన్ని రకాలుగా కృషి చేస్తున్నాయని స్పష్టంచేశారు.

రిలయన్స్ ఫౌండేషన్​ చేపట్టిన "మిషన్​ అన్న సేవ" ప్రపంచవ్యాప్తంగా ఏ కార్పొరేటు కంపెనీ అమలుచేయనంత పెద్ద అన్నదాన కార్యక్రమమని తెలిపారు ఆ సంస్థ ఛైర్​పర్సన్​ నీతా అంబానీ. లాక్​డౌన్ కారణంగా కష్టాలు ఎదుర్కొంటున్న వారిలో 3 కోట్ల మందికిపైగా భోజన సదుపాయం కల్పించే లక్ష్యంతో పనిచేస్తున్నట్లు తెలిపారు. రిలయన్స్ ఇండస్ట్రీస్​ బోర్డ్ డైరక్టెర్​గానూ ఉన్న ఆమె... ఈమేరకు సంస్థ ఉద్యోగులకు లేఖ రాశారు.

"బృహన్​ముంబయి మున్సిపల్ కార్పొరేషన్ భాగస్వామ్యంతో దేశంలోనే తొలి కొవిడ్ ఆస్పత్రిని 100 పడకలతో 2 వారాల్లోనే నిర్మించాం. ఆ అస్పత్రిని 250 పడకలకు విస్తరిస్తున్నాం. రోజుకు లక్ష మాస్కులు, లక్ష పీపీఈలు ఉత్పత్తి చేసి దేశవ్యాప్తంగా ఉన్న వైద్య సిబ్బంది, ఇతర సహాయ సిబ్బందికి అందజేస్తాం" అని లేఖలో పేర్కొన్నారు నీతా అంబానీ.

తమ సంస్థలో పని చేస్తున్న ఉద్యోగులు, వారి కుటుంబాల భద్రతకు అధిక ప్రాధాన్యం ఇస్తున్నట్లు చెప్పారు నీతా అంబానీ

హ్యూందాయ్ ఇండియా..

కరోనాపై సమరానికి సాయంగా పీఎం కేర్స్​ నిధికి రూ.7 కోట్లు విరాళంగా ఇచ్చినట్లు హ్యూందాయ్ ఇండియా తెలిపింది. ఈ క్లిష్ట పరిస్థితుల్లో ఆర్థిక సాయాన్ని అందజేసి భారత ప్రజలకు సంఘీభావాన్ని తెలిపినట్లు సంస్థ సీఈఓ ఎస్ ఎస్ కిమ్ తెలిపారు. తమిళనాడు సీఎం సహాయ నిధికి రూ.5 కోట్లు విరాళం అందించినట్లు వెల్లడించారు. రూ. 4కోట్ల విలువైన కరోనా పరీక్షా కిట్లనూ అందించామని, ఇవి 25 వేల మందిని పరీక్షించడానికి సరిపోతాయని ఆయన చెప్పారు.

ఇదీ చూడండి:'కరోనా సంక్షోభంలో రిలయన్స్‌ స్పందన భేష్'