స్థూల ఆర్థిక గణాంకాలు, రెపో రేటుపై ఆర్బీఐ నిర్ణయం, అంతర్జాతీయ పరిణామాలు ఈ వారం స్టాక్ మార్కెట్లపై ప్రభావం చూపే ప్రధాన అంశాలుగా నిపుణులు అంచనా వేస్తున్నారు.
తయారీ, సేవా రంగాల ఉత్పత్తి గణాంకాలు ఈ వారంలో విడుదల కానున్నాయి. వీటి ప్రభావం సూచీలపై పడొచ్చని నిపుణులు అంటున్నారు.
ప్రస్తుత ఆర్థిక సంవత్సర రెండో త్రైమాసికంలో వృద్ధి రేటు 4.5 శాతంగా నమోదైంది. ఈ గణాంకాలు మాంద్యం భయాలను పెంచుతున్నాయని నిపుణులు అభిప్రాయపడుతున్నారు. ఈ అంశాలు మదుపరుల సెంటిమెంట్ను ఎక్కువగా ప్రభావితం చేయొచ్చని.. ఫలితంగా వారంలో తొలి ట్రేడింగ్ ప్రతికూలంగా ఉండొచ్చని విశ్లేషిస్తున్నారు.
"ఈ వారంలో.. నవంబర్ వాహన విక్రయాల గణాంకాలు, ఆర్బీఐ నిర్ణయాలు మార్కెట్లను ప్రభావితం చేయనున్నాయి."
-వినోద్ నాయర్, జియోజిత్ ఫినాన్షియల్ సర్వీసెస్
అంతర్జాతీయ అంశాలను పరిశీలిస్తే.. చైనా-అమెరికాల మధ్య ఇటీవల రాజుకున్న హాంకాంగ్ వివాదం అంతర్జాతీయ మార్కెట్లకు ప్రతికూలంగా మారింది. దేశీయ మార్కెట్లను ఈ అంశం ప్రభావితం చేసే అవకాశమున్నట్లు నిపుణులు అభిప్రాయపడుతున్నారు.
అక్టోబర్లో చిల్లర ద్రవ్యోల్బణం పెరగటం, 2019-20 రెండో త్రైమాసికంలో వృద్ధి మందగించడం వంటి పరిణామాల నేపథ్యంలో ఈ నెలలోనూ ఆర్బీఐ రెపో రేటు తగ్గే అవకాశముందని ఆర్థిక నిపుణులు అంచనా వేస్తున్నారు. అనుకున్నట్లుగానే రెపో రేటు తగ్గితే మార్కెట్లు కొంత సానుకూలంగా ట్రేడయ్యే అవకాశముందన్నది వారి మాట.
అంతర్జాతీయంగా ముడి చమురు ధరలు, డాలర్తో రూపాయి మారకం విలువ వంటివి దేశీయ సూచీలను ప్రభావితం చేసే అవకాశముంది.
ఇదీ చూడండి:మార్కెట్‌ మహరాజా: డాక్టర్‌ గారి జేబులో లాభాల మాత్ర!
