ప్రస్తుత ఆర్థిక సంవత్సరం రెండో త్రైమాసికంలో స్థూల దేశీయోత్పత్తి (జీడీపీ) వృద్ధి.. గత త్రైమాసికంతో పోలిస్తే.. మెరుగవుతుందని రిజర్వు బ్యాంక్ గవర్నర్ శక్తికాంత దాస్ ఆశాభావం వ్యక్తం చేశారు.
2019-20 తొలి త్రైమాసికంలో జీడీపీ వృద్ధి 5.1 శాతంగా నమోదైంది. ఇది ఆరేళ్ల కనిష్ఠం. ఈ నేపథ్యంలో ప్రభుత్వం ప్రకటిస్తున్న ఉద్దీపనలు వృద్ధికి ఊతమందిస్తాయని శక్తికాంతదాస్ అన్నారు.
కార్పొరేట్లకు సుంకాల తగ్గింపును శక్తికాంత దాస్ స్వాగతించారు. ప్రభుత్వం తీసుకుంటున్న సాహసోపేతమైన నిర్ణయాలు అన్ని రంగాల వృద్ధికి దోహదపడతాయని దాస్ ఉద్ఘాటించారు. మరిన్ని సంస్థాగత సంస్కరణలు అవసరమని అభిప్రాయపడ్డారు. అయితే నిర్ణయాలు తీసుకోవడంలో ఆర్బీఐ మరింత స్వతంత్రంగా వ్యవహరిస్తుందని గుర్తుచేశారు.
దేశీయ కంపెనీలకు 25.17 శాతం కార్పొరేట్ సుంకాన్ని తగ్గిస్తున్నట్లు ఆర్థిక మంత్రి నిర్మలా సీతారామన్ ప్రకటించారు. పెట్టుబడులను ప్రోత్సహించేందుకు ఈ నిర్ణయం తీసుకున్నట్లు సీతారామన్ పేర్కొన్నారు.
ఇదీ చూడండి: ఒక్క ప్రకటనతో రూ.2.11 లక్షల కోట్లకు పెరిగిన సంపద