పండుగ సీజన్​లోనూ మారని 'ఆటో' గేర్​

దేశీయ ఆటోమొబైల్​ రంగంలో అమ్మకాలు వరుసగా 11వ నెలలోనూ క్షీణించాయి. గతేడాదితో పోల్చితే 2019 సెప్టెంబర్​లో విక్రయాలు సుమారు 24 శాతం తగ్గినట్లు సియామ్​ వెల్లడించింది.

దేశీయ ఆటోమొబైల్​ రంగంలో నెలకొన్న సంక్షోభం తీవ్ర స్థాయికి చేరుకుంది. వరుసగా 11వ నెలలోనూ ప్రయాణ వాహనాల విక్రయాలు పడిపోయాయి. దేశీయంగా ప్యాసింజర్​ వాహనాల విక్రయాలు 2019 సెప్టెంబర్​లో 23.69 శాతం తగ్గాయి. ఇండియన్​ సొసైటీ ఆఫ్​ ఇండియన్​ ఆటోమొబైల్​ మ్యానుఫాక్చరర్స్​ (సియామ్​) ఈమేరకు తాజా గణాంకాలు వెల్లడించింది.

సెప్టెంబర్​ నెలలో ప్రయాణ వాహనాల అమ్మకాలు 2,23,317 యూనిట్లుగా నమోదైనట్లు సియామ్​ వెల్లడించింది. 2018 సెప్టెంబర్​ విక్రయాలు 2,92, 660 యూనిట్లుగా ఉన్నట్లు గుర్తుచేసింది.

దేశీయ కార్ల విక్రయాల్లో 2018 సెప్టెంబర్​తో పోల్చితే ఈ ఏడాది 33.4 శాతం క్షీణత నమోదయింది. 2018 సెప్టెంబర్​లో 1,97,124 కార్లు అమ్ముడవగా.. గత నెలలో ఇది 1,31, 281 యూనిట్లకు పరిమితమైంది.

మోటర్​ సైకిల్​ విక్రయాలు గత నెలలో 23.29 శాతం తగ్గాయి. 2019 సెప్టెంబర్​లో 10,43,624 యూనిట్లకు అమ్ముడవగా.. 2018 సెప్టెంబర్​లో 13,60,415 యూనిట్ల విక్రయాలు జరిగాయి.

ద్విచక్ర వాహనాల అమ్మకాలు సెప్టెంబర్​లో 22.09 శాతం క్షీణించాయి. 2019 సెప్టెంబర్​లో 16,56,774 యూనిట్లుగా నమోదైనట్లు సియామ్​ పేర్కొంది. 2018 సెప్టెంబర్​లో ద్విచక్ర వాహనాల విక్రయాలు 21,26,445 యూనిట్లుగా ఉన్నాయి.

వాణిజ్య వాహనాల విక్రయాలు 2019 సెప్టెంబర్​లో 39.06 శాతం క్షీణించి.. 58,419 యూనిట్లుగా నమోదయ్యాయి. గత ఏడాది ఇదే సమయానికి వీటి అమ్మకాలు 95,870 యూనిట్లుగా ఉన్నాయి.

అన్ని కేటగిరీలు కలిపి మొత్తంగా 20,04,932 యూనిట్లు అమ్ముడయ్యాయి. 2018 సెప్టెంబర్​లో అమ్ముడైన 25,84,062 యూనిట్లతో పోల్చితే ఇది 22.41 శాతం తక్కువ అని సియామ్​ పేర్కొంది.

ఇదీ చూడండి: సేవలు నిలిచిన 10 గూగుల్ యాప్​లు ఇవే..