మరో నెల రోజులు జైల్లోనే నీరవ్​ మోదీ

లండన్​ కోర్టులో నీరవ్​ మోదీకి మరో సారి చుక్కెదురైంది. పీఎన్​బీ కేసులో ప్రధాన నిందితుడిగా ఉన్న నీరవ్​ను నేడు విచారించిన లండన్ కోర్టు.. వచ్చే నెల 17 వరకు కస్టడీ పెంచుతూ ఉత్తర్వులు జారీ చేసింది.

పంజాబ్​ నేషనల్​ బ్యాంకు కుంభకోణంలో ప్రధాన నిందితుడు.. వజ్రాల వ్యాపారి నీరవ్ మోదీకి అక్టోబర్​ 17 వరకు కస్టడీని పొడిగించింది లండన్​లోని వెస్ట్ మినిస్టర్ కోర్డు. వీడియో కాన్ఫరెన్స్​ ద్వారా.. లండన్​ జైలు నుంచి నీరవ్​ మోదీ విచారణకు హాజరయ్యారు. ఈ విచారణ అనంతరం నీరవ్ కస్టడీ పెంచుతూ ఉత్తర్వులిచ్చింది కోర్టు. నీరవ్ మోదీ విచారణ వచ్చే ఏడాది మే 11 నుంచి 15 వరకు ఉండొచ్చని తెలిసింది.

ఈ ఏడాది మార్చి19న నీరవ్‌ మోదీని అరెస్టు చేసిన స్కాట్లాండ్ యార్డ్ పోలీసులు లండన్‌లోని వాండ్స్‌వర్త్ జైల్లో ఉంచారు. ఇది లండన్​లో అత్యంత రద్దీగా ఉండే కారాగారాల్లో ఒకటి. అంతకు ముందు నుంచే భారత దర్యాప్తు సంస్థలు ఈడీ, సీబీఐలు నీరవ్​ను భారత్​కు రప్పించేందుకు చాలా ప్రయత్నించాయి. సమన్లు జారీ చేసినప్పటికీ నీరవ్ వాటికి స్పందించలేదు.

ఇదీ చూడండి: ఉద్దీపన పథకాలు ఇప్పుడే వద్దు: దువ్వూరి సుబ్పారావు