భారతీయ వ్యాపార దిగ్గజం టాటా గ్రూపునకు షాకిచ్చింది జాతీయ కంపెనీ లా అపీలేట్ ట్రైబ్యునల్. టాటా సన్స్ సంస్థకు సైరస్ మిస్త్రీని ఎగ్జిక్యూటివ్ ఛైర్మన్గా పునర్నియమిస్తూ నిర్ణయం తీసుకుంది. ఎగ్జిక్యూటివ్ ఛైర్మన్గా ఎన్. చంద్ర నియామకం అక్రమమని తీర్పు ఇచ్చింది ట్రైబ్యునల్. అయితే పునర్నియామకానికి నాలుగు వారాల గడువు విధించింది. ఈ సమయంలో టాటా సన్స్ సంస్థ అప్పీలు చేసుకునేందుకు అవకాశం కల్పించింది.
షాపూర్జీ పల్లోంజీ వ్యాపార సంస్థ వారసుడైన సైరస్ మిస్త్రీ 2012లో టాటా సన్స్కు అధినేత అయ్యారు. తర్వాత మారిన పరిస్థితుల మధ్య 2016 అక్టోబర్లో టాటా సన్స్ బాధ్యతల నుంచి మిస్త్రీని తప్పించారు. అనంతర కాలంలో టాటా సన్స్ గ్రూప్ బోర్డు సభ్యుడిగానూ మిస్త్రీని తొలగించారు. ఈ నేపథ్యంలో టాటా సన్స్లో 18.4 శాతం వాటాతో మైనారిటీ వాటాదారుగా ఉన్న మిస్త్రీ గ్రూప్ షాపూర్జీ జాతీయ కంపెనీ లా ట్రైబ్యునల్ను ఆశ్రయించింది. అయితే ఈ కేసును ఎన్సీఎల్టీ కొట్టివేసింది. ఈ నేపథ్యంలో అపీలేట్ ట్రైబ్యునల్ను ఆశ్రయించారు మిస్త్రీ. విచారణ అనంతరం సైరస్ను తిరిగి ఎగ్జిక్యూటీవ్ ఛైర్మన్గా నియమించాలంటూ అపీలేట్ ట్రైబ్యునల్ తీర్పు ఇచ్చింది.