కాంగ్రెస్ అభ్యర్థి మిలింద్ దేవరాకు మద్దుతు పలికిన ముఖేశ్ అంబానీ సార్వత్రిక ఎన్నికల్లో గెలుపే లక్ష్యంగా భాజపా, కాంగ్రెస్ ప్రచారాలతో హోరెత్తిస్తున్నాయి. కాంగ్రెస్ అధ్యక్షుడు రాహుల్ గాంధీ ఏ రాష్ట్రానికి ప్రచారానికి వెళ్లినా రఫేల్ ఒప్పందాన్ని ప్రస్తావిస్తూనే ఉంటారు. రఫేల్ ఒప్పందంలో ప్రధాని నరేంద్ర మోదీ వ్యాపారి అనిల్ అంబానీకి అనుచిత లబ్ధి చేకూర్చారని ఆరోపిస్తుంటారు. ఈ తరుణంలో అనిల్ అంబానీ సోదరుడు, రిలయన్స్ ఇండస్ట్రీస్ ఛైర్మన్ ముఖేశ్ అంబానీ ఓ కాంగ్రెస్ అభ్యర్థికి ఎన్నికల్లో మద్దతివ్వడం చర్చనీయాంశమైంది.
అసలు సంగతేంటి..?
మిలింద్ దేవరా... మాజీ కేంద్ర మంత్రి. దక్షిణ ముంబయి లోక్సభ స్థానానికి కాంగ్రెస్ తరఫున పోటీ చేస్తున్నారు. ఇటీవల ట్విట్టర్లో ఆయన ఓ వీడియో పంచుకున్నారు. అందులో చిన్న వ్యాపారుల నుంచి వ్యాపార దిగ్గజం ముఖేశ్ అంబానీ, బ్యాంకింగ్ దిగ్గజం ఉదయ్ కోటక్ దేవరాపై ప్రశంసలు కురిపించారు. దక్షిణ ముంబయి నుంచి ఆయన అభ్యర్థిత్వానికి మద్దతు పలికారు.
"మిలింద్ అచ్చమైన దక్షిణ ముంబయి వాసి. దాదాపు 10 ఏళ్లు దక్షిణ బాంబేకు ప్రాతినిధ్యం వహించారు. దక్షిణ ముంబయి నియోజకవర్గంలోని సామాజిక, ఆర్థిక, సాంస్కృతిక స్థితిగతులపై మిలింద్కు లోతైన అవగాహన ఉందని నేను నమ్ముతున్నాను."
- ముఖేశ్ అంబానీ, రిలయన్స్ ఇండస్ట్రీస్ లిమిటెడ్ ఛైర్మన్
"ముంబయి వాసులవైపు దేవరా నిలబడతారని నాకు నిజంగా అనిపించింది. ఆయన కుటుంబానికి ముంబయితో విడదీయరాని సంబంధం ఉంది. మిలింద్కు ముంబయితో మంచి బంధం ఉంది."
- ఉదయ్ కోటక్, కోటక్ మహీంద్ర బ్యాంకు ఎండీ
అంబానీ, కోటక్ లాంటి దిగ్గజ వ్యాపారులు తనకు మద్దతుగా నిలవడం గౌరవంగా ఉందని దేవరా చెప్పారు. చిన్న వ్యాపారులు, పాన్వాలాలు తన వెంట నిలవడం అంతే ఆనందాన్ని ఇస్తుందన్నారు.
పరిశ్రమలు, వ్యాపారాల్లో పేరెన్నికగన్న ముంబయి గళం గత ఐదేళ్లలో పార్లమెంటులో మూగబోయింది. అంబానీ, కోటక్ మద్దతు పలకడం ఆనందంగా, గౌరవంగా ఉంది."
- మిలింద్ దేవరా, కాంగ్రెస్ నేత
ఎన్నికల్లో గెలిస్తే వ్యాపారహిత వాతావరణాన్ని తెచ్చేందుకు, ఉద్యోగ కల్పనకు ప్రయత్నిస్తానని దేవరా హామీ ఇచ్చారు. 2014 లోక్సభ ఎన్నికల్లో దేవరా శివసేన అభ్యర్థి అరవింద్ సావంత్ చేతిలో ఓడిపోయారు.
