రిలయన్స్ ఇండస్ట్రీస్ అధినేత ముకేశ్ అంబానీ మరో రికార్డు సాధించారు. ప్రపంచ అపర కుబేరుల్లో తొమ్మిదో స్థానంలో నిలిచారు. ప్రముఖ సంస్థ ఫోర్బ్స్ విడుదల చేసిన 'ద రియల్-టైమ్ బిలియనీర్స్ జాబితా'లో ఈ విషయం వెల్లడైంది. ఈ నివేదిక ప్రకారం ముకేశ్ అంబానీ సంపద 60 బిలియన్ డాలర్లు.
ఫోర్బ్స్ జాబితాలో ఈ కామర్స్ దిగ్గజం అమెజాన్ అధినేత.. జెఫ్ బెజోస్ అగ్రస్థానంలో నిలిచారు.
ఫోర్బ్స్ విడుదల చేసిన ఈ జాబితా.. ప్రపంచంలోని అత్యంత ధనవంతుల రోజువారీ సంపదను ట్రాక్ చేస్తుంది. గురువారం సాయంత్రం 5 గంటల తర్వాతి సంపదల ఆధారంగా ఈ గణాంకాలు వెల్లడించింది ఈ సంస్థ. ఫోర్బ్స్ వార్షిక జాబితాలో ముకేశ్కు 13వ స్థానం దక్కిన విషయం తెలిసిందే.
గత సెషన్లో రిలయన్స్ షేరు విలువ గణనీయంగా పెరిగి కంపెనీ మార్కెట్ క్యాపిటల్ రూ.10 లక్షల కోట్లను దాటింది. ఈ నేపథ్యంలో ఆయన ప్రపంచంలోనే తొలి 10 మంది అపర కుబేరుల జాబితాలో చోటుదక్కించుకున్నారు. మార్కెట్ క్యాపిటల్లో రూ.10 లక్షల కోట్లను దాటిన తొలి భారత కంపెనీ రిలయన్స్ ఇండస్ట్రీస్ కావడం మరో విశేషం.
జాబితా వివరాలు ఇలా..
| పేరు | సంస్థ-పదవి | సంపద (బిలియన్ డాలర్లలో) |
| జెఫ్ బెజోస్ | అమెజాన్-వ్యవస్థాపకుడు | 113 |
| బిల్ గేట్స్ | మైక్రోసాఫ్ట్-సహ వ్యవస్థాపకుడు | 107.4 |
| బెర్నార్డ్ ఆర్నల్ట్ & ఫ్యామిలీ | ఎల్వీఎంహెచ్ (లగ్జరీ గూడ్స్ కంపెనీ) ఛైర్మన్ | 107.2 |
| వారెన్ బఫెట్ | బెర్క్షైర్ హాత్వే-సీఈఓ | 86.9 |
| మార్క్ జుకర్బర్గ్ | ఫేస్బుక్-సీఈఓ | 74.9 |
| అమాన్సియో ఒర్టెగా | ఇండిటెక్స్ ఫ్యాషన్ గ్రూప్-ఛైర్మన్ | 69.3 |
| లారీ ఎలీసన్ | ఒరాకిల్-సహ వ్యవస్థాపకుడు | 69.2 |
| కార్లోస్ స్లిమ్ హెలు | గ్రూపో కార్లో-సహ వ్యవస్థాపకుడు | 60.9 |
| ముకేశ్ అంబానీ | రిలయన్స్ ఇండస్ట్రీస్-ఛైర్మన్ | 60 |
| లారీ పేజ్ | ఆల్ఫాబెట్-సీఈఓ | 59.6 |
ఇదీ చూడండి:'కార్పొరేట్ సుంకాలు.. పెట్టుబడులకు ముఖ్య సాధనం'
