రుణ రహిత కంపెనీగా మారనున్న రిలయన్స్ ఇండస్ట్రీస్ (ఆర్‌ఐఎల్‌), ఈ నెల 15న వీడియో కాన్ఫరెన్స్ ద్వారా నిర్వహించబోయే 43వ వార్షిక సర్వసభ్య సమావేశం (ఏజీఎం)లో మరిన్ని భారీ ప్రకటనలు చేస్తుందని పరిశ్రమ వర్గాలు ఆశిస్తున్నాయి. ఇప్పటికే భారీగా నిధులు సమీకరించిన డిజిటల్‌ విభాగమైన జియో ప్లాట్‌ఫామ్స్‌కు సంబంధించి, కొత్తగా ఆరంభించిన దృశ్యమాధ్యమ సమావేశ ఆన్‌లైన్‌ వేదిక జియోమీట్‌ గురించి 26 లక్షల మంది వాటాదార్లకు తీపికబుర్లు చెబుతారని అంచనా వేస్తున్నారు.
జియో ప్లాట్‌ఫామ్స్‌/మార్ట్‌
ఆర్‌ఐఎల్‌ అనుబంధ రిలయన్స్ రిటైల్‌కు చెందిన ఇ-కామర్స్‌ ప్లాట్‌పామ్‌ జియోమార్ట్‌ ఇప్పటికే దేశవ్యాప్తంగా పలు నగరాలలో సేవలు ప్రారంభించింది. కొవిడ్‌-19 సంక్షోభం నేపథ్యంలో నిత్యావసరాలు కూడా ఆన్‌లైన్‌లో తెప్పించుకోవడం పెరుగుతోంది. కోట్ల మంది చిరువ్యాపారులతో అనుసంధానమయ్యే జియోమార్ట్‌ను ఈ రంగంలో దిగ్గజ సంస్థగా నిలబెట్టాలన్నది ఆర్‌ఐఎల్‌ ప్రణాళిక. ఫేస్‌బుక్‌ నేరుగా జియో ప్లాట్‌ఫామ్స్‌లో దాదాపు 10 శాతం వాటా కొనుగోలు చేయగా, ఫేస్‌బుక్‌ ఆధీనంలోని మెసేజింగ్‌ యాప్‌ వాట్సాప్‌ సాయంతో జియోమార్ట్‌ కార్యకలాపాలు సాగుతున్నాయి. భారీగా నిధులు సమీకరించిన జియో ప్లాట్‌ఫామ్స్‌ను అంతర్జాతీయ స్టాక్‌ఎక్స్ఛేంజీల్లో నమోదు చేస్తారనే అంచనాలున్నాయి. ఈ ప్రకటన కోసం వాటాదార్లంతా ఎదురు చూస్తున్నారు.
అగ్రగామి జియో
దేశీయ మొబైల్‌ విపణిలో రిలయన్స్ జియో అగ్రగామిగా ఎదిగింది. 36 శాతం వాటా పొందింది. 2024కు చందాదార్ల పరంగా 41 శాతం వాటా, ఆదాయం పరంగా 44 శాతం వాటా సాధించాలనేది సంస్థ లక్ష్యం. వైరుతో అత్యధికవేగం బ్రాడ్‌బ్యాండ్‌ సేవలు అందించే జియో ఫైబర్‌పై సంస్థ మరింత దృష్టి సారించే అవకాశం ఉంది.