తొలి రోజు ట్రేడింగ్​లో కిమ్స్, దొడ్ల డెయిరీ అదరహో..!

తెలుగు రాష్ట్రాలకు చెందిన క్రిష్ణ ఇన్​​స్టిట్యూట్​ ఆఫ్​ మెడికల్ సైన్సెస్​ లిమిటెడ్​ (కిమ్స్​), దొడ్ల డెయిరీ సంస్థలు సోమవారం ఎక్స్ఛేంజీల్లో లిస్టయ్యాయి. తొలి రోజు సెషన్​లోనే రెండు సంస్థలు భారీ లాభాలను సాధిస్తున్నాయి. కిమ్స్​ షేరు 28 శాతం, దొడ్ల డెయిరీ షేరు ఏకంగా 48 శాతం లాభాన్ని గడించాయి.

తెలుగు రాష్ట్రాల నుంచి ఇటీవల ఐపీఓకు వచ్చిన క్రిష్ణ ఇన్స్​స్టిట్యూట్​ ఆఫ్​ మెడికల్ సైన్సెస్​ లిమిటెడ్​ (కిమ్స్​), దొడ్ల డెయిరీ సంస్థలు ఎక్స్ఛేంజీల్లో సోమవారం లిస్టింగ్​కు వచ్చాయి. తొలిరోజు ట్రేడ్​లోనే రెండు సంస్థలు దూసుకుపోతున్నాయి.

కిమ్స్​ 28 శాతం వృద్ధి..

రూ.825 వద్ద ఇష్యూకు వచ్చిన కిమ్స్​ షేరు.. బీఎస్​ఈలో 22.29 శాతం లాభంతో రూ.1,008.90 వద్ద ట్రేడింగ్ ప్రారంభించింది. కిమ్స్​ షేర్లపై మదుపరులు ఆసక్తి చూపడం వల్ల ఒకానొక దశలో 28.23 శాతం లాభపడి.. షేరు విలువ రూ.1,057.95 గరిష్ఠ స్థాయిని తాకింది.

ఎన్​ఎస్ఈలో 22.30 శాతం లాభంతో రూ.1,009 వద్ద ట్రేడింగ్ ప్రారంభించింది కిమ్స్​.

బీఎస్​ఈ ప్రకారం.. కిమ్స్​ మార్కెట్ విలువ రూ.7,671.46 కోట్లకు చేరింది.

ఈ నెలలోనే ఐపీఓకు వచ్చిన కిమ్స్​.. 3.86 రెట్లు అధిక సబ్​స్క్రిప్షన్లను సాధించింది. కిమ్స్​ ప్రస్తుతం రెండు తెలుగు రాష్ట్రాల్లో కార్పొరేట్ ఆస్పత్రులను నిర్వహిస్తోంది. త్వరలో తమిళనాడులో ఆస్పత్రిని ప్రారంభించేందుకు కసరత్తు చేస్తోంది.

దొడ్ల డెయిరీ హై జంప్​..

హైదరాబాద్‌కు చెందిన పాల ఉత్పత్తుల సంస్థ దొడ్ల డెయిరీ కూడా.. తొలి రోజు సెషన్​ ఆరంభంలో.. బీఎస్​ఈలో 23.36 శాతం లాభంతో రూ.528 వద్ద ట్రేడింగ్ ప్రారంభించింది. మదుపరుల కొనుగోలు ఉత్సాహంతో ఏకంగా 48 శాతం లాభంతో షేరు విలువ.. రూ.633.60 వద్దకు చేరింది.

ఎన్​ఎస్​ఈలో 28.50 శాతం లాభంతో రూ.550 వద్ద ట్రేడింగ్ ప్రారంభించింది దొడ్ల డెయిరీ.

బీఎస్​ఈ ప్రకారం దొడ్ల డెయిరీ మార్కెట్ విలువ రూ.3,489 వద్దకు చేరింది.

రూ.520 కోట్ల నిధుల సమీకరణ లక్ష్యంతో.. జూన్ 16-18 మధ్య ఐపీఓకు వచ్చిన దొడ్ల డెయిరీ. 45.61 రెట్ల అధిక సబ్​స్క్రిప్షన్లను సాధించింది.

తెలంగాణ, ఆంధ్రప్రదేశ్​, కర్ణాటక, తమిళనాడులో దొడ్ల డెయిరీ ప్రధానంగా కార్యకలాపాలు సాగిస్తోంది. ఉగాండా, కెన్యా కేంద్రాలుగా అంతర్జాతీయంగా వ్యాపారాలు నిర్వహిస్తోంది.

ఇవీ చదవండి: