'భారత ఆర్థిక పరిస్థితి మరింత దయనీయం'

భారత ఆర్థిక వృద్ధిపై అంతర్జాతీయ ద్రవ్య నిధి ఆందోళన వ్యక్తం చేసింది. ప్రస్తుతం ఆర్థిక సంవత్సరం అంచనా వేసిన స్థాయికన్నా తక్కువగా జీడీపీ వృద్ధి నమోదవుతున్నట్లు తాజా ప్రకటనలో వెల్లడించింది.

దేశ ఆర్థిక వృద్ధి ఆశించిన దానికంటే ఇంకా తక్కువగా నమోదవుతున్నట్లు అంతర్జాతీయ ద్రవ్య నిధి(ఐఎంఎఫ్​) వెల్లడించింది. కార్పొరేట్, పర్యావరణ నియంత్రణ అనిశ్చితులకు తోడు బ్యాంకింగేతర ఆర్థిక సంస్థల సంక్షోభం ఇందుకు ప్రధాన కారణంగా ఐఎంఎఫ్​ పేర్కొంది.

ప్రస్తుత ఆర్థిక సంవత్సరం తొలి త్రైమాసికంలో భారత్​ జీడీపీ వృద్ధి 5 శాతంగా మాత్రమే నమోదుకావడంపై ఐఎంఎఫ్​ ఆందోళన వ్యక్తం చేసింది. గత ఆరేళ్లలో ఇంత తక్కువ వృద్ధి నమోదు కావడం ఇదే ప్రథమమని గుర్తుచేసింది.

2019, 2020 రెండేళ్లకు గానూ భారత ఆర్థిక వృద్ధి అంచనాలను 0.3 శాతం తగ్గిస్తూ జులైలో నివేదిక విడుదల చేసింది ఐఎంఎఫ్​. ఈ నివేదిక ప్రకారం 2019లో 7 శాతం, 2020లో 7.2 శాతం వృద్ధి నమోదవుతుందని తెలిపింది.

మందగమనం ఉన్నప్పటికీ.. వేగంగా వృద్ధి చెందుతున్న ఆర్థిక వ్యవస్థల్లో భారత్​.. చైనా కన్నా ముందున్నట్లు ఐఎంఎఫ్ ప్రతినిధి గేరీ రైస్​ తెలిపారు.

ఇదీ చూడండి: 'అక్టోబరులో భారీగా తగ్గనున్న వడ్డీ రేట్లు!'