మరోమారు తగ్గిన జీడీపీ.. 2019-20 క్యూ2లో 4.5 శాతమే

ప్రపంచ వ్యాప్తంగా నెలకొన్న ఆర్థిక మాంద్యం ప్రభావం.. దేశ జీడీపీపై స్పష్టంగా కనిపిస్తోంది. ప్రస్తుత ఆర్థిక సంవత్సరం రెండో త్రైమాసికంలో.. జీడీపీ ఆరేళ్ల కనిష్ఠం వద్ద 4.5 శాతానికి పరిమితమైనట్లు అధికారిక గణాంకాల్లో తేలింది.

భారత స్థూల దేశీయోత్పత్తి (జీడీపీ) ప్రస్తుత ఆర్థిక సంవత్సరం రెండో త్రైమాసికంలోనూ క్షీణించింది. 2019-20 జులై-సెప్టెంబర్ మధ్య మూడు నెలల కాలంలో 4.5 శాతానికే పరిమితమైనట్లు కేంద్రం తాజా గణాంకాల్లో వెల్లడించింది. ఇది ఆరేళ్ల కనిష్ఠస్థాయి. ఈ గణాంకాలు ఆర్థిక మాంద్యం భయాలను మరింత పెంచుతున్నాయి.

ఇంతకు ముందు 2012-13 జనవరి-మార్చి త్రైమాసికంలో జీడీపీ 4.3 శాతంగా నమోదైంది.

2018-19 రెండో త్రైమాసికంలో మాత్రం జీడీపీ 7 శాతంగా ఉండటం గమనార్హం.

వృద్ధి మందగిస్తున్న నేపథ్యంలో.. 2019-20 జీడీపీ అంచనాలను 6.9 శాతం నుంచి 6.1 శాతానికి తగ్గిస్తూ రిజర్వు బ్యాంకు ఇటీవల నివేదిక విడుదల చేసిన విషయం తెలిసిందే.

ఇదీ చూడండి:ప్రపంచ కుబేరుల్లో 9వ స్థానానికి ముకేశ్ అంబానీ