భారత్​ 'నో'తో... 10 కోట్ల మంది రైతులకు మేలు!

ఆర్​సెప్​కు నో చెప్పడం భారత పాడి రైతులకు ఎంతో మేలు చేస్తుందని అమూల్ మేనేజింగ్ డైరెక్టర్​ ఆర్​.ఎస్​.సోది అన్నారు. డైరీ పరిశ్రమకు సంబంధించిన పలు కీలక అంశాలను 'ఈటీవీ భారత్'​తో ఆయన ప్రత్యేకంగా పంచుకున్నారు. ఆ విశేషాలు మీ కోసం.

ప్రాంతీయ సమగ్ర ఆర్థిక భాగస్వామ్య ఒప్పందం (ఆర్​సెప్​)లో భారత్​ చేరదని ప్రధాని నరేంద్ర మోదీ ఇటీవల చేసిన ప్రకటనపై దేశవ్యాప్తంగా పరిశ్రమ వర్గాలు హర్షం వ్యక్తం చేస్తున్నాయి. ఈ విషయంపై గుజరాత్ సహకార పాల ఉత్పత్తి సమాఖ్య (అమూల్) మేనేజింగ్ డైరక్టర్​ ఆర్​.ఎస్​. సోది తన ఆనందాన్ని 'ఈటీవీ భారత్​'తో పంచుకున్నారు.

"భారత్​లో పాల ఉత్పత్తి న్యూజిలాండ్​, ఆస్ట్రేలియాలోలా వ్యాపారం కాదు. దేశవ్యాప్తంగా దాదాపు 10 కోట్ల మంది రైతులకు జీవనాధారం. డైరీ ఉత్పత్తిని పెంచేందుకు మేము చేసిన సిఫార్సుల పట్ల ప్రభుత్వం సానుకూలంగా స్పందించింది. రైతులకు ప్రోత్సాహం ఇవ్వాలని నిర్ణయించింది. ఇలా చేయడం సంతోషకరం."
- ఆర్​.ఎస్​. సోది, అమూల్ మేనేజింగ్ డైరెక్టర్​

కేంద్ర వాణిజ్య శాఖ మంత్రి పీయూష్​ గోయల్​కు ఈ ఏడాది జులైలో ఆర్.ఎస్​.సోది ఒక లేఖ రాశారు. ఆర్​సెప్​ ఒప్పందానికి భారత్​ అంగీకరిస్తే.. ఎదురయ్యే సమస్యలను అందులో వివరించారు.

డైరీ పరిశ్రమపై మాంద్యం ప్రభావం?

ప్రస్తుతం నెలకొన్న ఆర్థిక వృద్ధి మందగమన ప్రభావం డైరీ పరిశ్రమపై అంతగా ఉండదని ఆర్​.ఎస్.సోది అన్నారు. డైరీ ఉత్పత్తుల వినియోగంలోనూ ఎలాంటి మార్పు ఉండదని విశ్లేషించారు.

ఇందుకు ఉదాహరణగా.. గత ఏడు నెలల్లో అన్ని డైరీ ఉత్పత్తుల విభాగాల్లో రెండింతల వృద్ధి సాధించినట్లు తెలిపారు. భవిష్యత్​లోనూ డైరీ ఉత్పత్తుల డిమాండ్​ వృద్ధి కొనసాగుతుందని ఆయన ఆశాభావం వ్యక్తం చేశారు. ఈ కారణంగానే ఆస్ట్రేలియా, న్యూజిలాండ్​ దేశాలు భారత డైరీ పరిశ్రమలోకి ప్రవేశించేందుకు ఆసక్తి చూపుతున్నాయని వివరించారు.

డైరీ పరిశ్రమలో విదేశీ పెట్టుబడులు?

భారత డైరీ పరిశ్రమలో విదేశీ పెట్టుబడులు, సాంకేతికతకు తాము వ్యతిరేకం కాదని ఆర్.ఎస్​ సోది స్పష్టం చేశారు. అయితే భారత రైతుల నుంచి మాత్రమే వాళ్లు పాలు కొనుగోలు చేయాలనే నిబంధన ఉండాలని ఆయన విన్నవించారు.

ఇదీ చూడండి: 'కుటుంబ వ్యాపారాలకు వారసత్వ సమస్యలు'