టెలికామేతర ప్రభుత్వ రంగ సంస్థల నుంచి రావాల్సిన రూ.4 లక్షల కోట్ల సవరించిన స్థూల ఆదాయం (ఏజీఆర్) బకాయిల్లో టెలికాం విభాగం (డీఓటీ) 96 శాతం వదులుకోనున్నట్లు కేంద్రం.. సుప్రీం కోర్టుకు తెలిపింది. ఏజీఆర్ బకాయిలపై గెయిల్ సహా ఇతర టెలికామేతర సంస్థల నుంచి వస్తున్న డిమాండ్ సహా బకాయిలు వదులుకునేందుకు కారణాలతో కూడిన అఫిడవిట్ను కేంద్రం తరఫున సొలిసిటర్‌ జనరల్‌ తుషార్‌ మెహతా సుప్రీం ధర్మాసనానికి సమర్పించారు.
అప్పటిలోపు ఆ వివరాలు చెప్పండి..
జస్టిస్ అరుణ్ మిశ్రా నేతృత్వంలోని జస్టిస్ అబ్దుల్ నజీర్, జస్టిస్ ఎం.ఆర్. సిన్హాల నేతృత్వంలోని త్రిసభ్య ధర్మాసనం వీడియో కాన్ఫరెన్స్ ద్వారా ఈ కేసు విచారించింది. ఇందులో ప్రైవేటు టెలికాం కంపెనీలైన భారతీ ఎయిర్టెల్, వొడాఫోన్ ఐడియాలు సమర్పించిన ఏజీఆర్ బకాయిల అఫిడవిట్పైనా స్పందించింది. జులై మూడో వారంలో విచారణ సమయానికి ఆయా కంపెనీలు తమ ఆర్థిక స్థితిపై స్టేట్మెంట్ను సమర్పించాలని సూచించింది.
కష్టాల్లో ఉన్నాం: వొడాఫోన్ ఐడియా
బకాయిల వసూలుకు వీలుగా కంపెనీలు సమర్పించాల్సిన బ్యాంకు గ్యారెంటీలు, హామీల వివరాలపై ప్రశ్నించింది ధర్మాసనం. టెలికాం సంస్థలు తమ ఏజీఆర్ బకాయిల్లో కొంత మొత్తం చెల్లించాలని ఆదేశించింది. కరోనా కారణంగా నెలకొన్న సంక్షోభంతో ఇప్పుడు ప్రభుత్వానికి డబ్బు ఎంతో అవసరమని పేర్కొంది. కరోనా కాలంలోనూ టెలికాం సంస్థలు ఆదాయం గడించాయని.. అందుకే వీరు కచ్చితంగా ఎంతో కొంత డబ్బు డిపాజిట్ చేయాలని స్పష్టం చేసింది.
ఈ విషయంపై సీనియర్‌ న్యాయవాది ముకుల్‌ రోహత్గీ వొడాఫోన్-ఐడియా తరఫున వాదనలు వినిపించారు. ఇలాంటి సమయాల్లో డబ్బులు చెల్లిస్తే.. ఉద్యోగులకు వేతనాలు ఇవ్వడమే కంపెనీకి కష్టంగా మారుతుందని కోర్టుకు తెలిపారు. ఇప్పటికే రూ.7 వేల కోట్లు ఏజీఆర్ బకాయిల కింద చెల్లించినట్లు వివరించారు. ఇవి కాకుండా ప్రభుత్వం వద్ద రూ.15,000 కోట్ల బ్యాంక్ గ్యారెంటీలు ఉన్న విషయాన్ని ఆయన గుర్తు చేశారు.
ఇదీ చూడండి:సెకండ్ హ్యాండ్లో కొత్త వాహనాలు కావాలా?
