రిలయన్స్, గూగుల్ డీల్​ ఫిక్స్- జియోలో 7.7% వాటా

జియో-గూగుల్ భాగస్వామ్యంపై రిలయన్స్ 43వ వార్షిక సర్వ సభ్య సమావేశంలో స్పష్టతనిచ్చారు సంస్థ అధినేత ముకేశ్ అంబానీ. జియో ప్లాట్​ఫామ్స్​లో గూగుల్ రూ.33.7 వేల కోట్లు పెట్టుబడి పెట్టనున్నట్లు ప్రకటించారు.

దేశీయ దిగ్గజ సంస్థ రిలయన్స్ ఇండస్ట్రీస్ 43వ వార్షిక సర్వ సభ్య సమావేశంలో కీలక ప్రకటన చేశారు సంస్థ ఛైర్మన్ ముకేశ్ అంబానీ. సెర్చ్ ఇంజిన్ దిగ్గజం గూగుల్ జియో ప్లాట్​ ఫామ్స్​లో రూ.33,737 కోట్లు పెట్టుబడి పెట్టేందుకు సిద్ధమైనట్లు వెల్లడించారు. ఈ పెట్టుబడితో జియో ప్లాట్​ఫామ్స్​లో 7.7 శాతం వాటా గూగుల్​కు దక్కనున్నట్లు తెలిపారు.

జియోలో గూగుల్ భారీ పెట్టుబడి

జియో ప్లాట్​ఫామ్స్​కు వచ్చిన పెట్టుబడులు ఆర్థిక భాగస్వామ్యం మాత్రమే కాదన్నారు ముకేశ్. భవిష్యత్​ ప్రణాళికల్లో గూగుల్, ఫేస్​బుక్, ఇంటెల్, క్వాల్కమ్​ వ్యూహాత్మక సాంకేతిక భాగస్వాములుగా ఉండనున్నట్లు వెల్లడించారు.

గూగుల్​ కన్నా ముందు ఫేస్​బుక్ సహా మొత్తం 12 కంపెనీలు 13 దఫాల్లో జియో ప్లాట్​ఫామ్స్​లో పెట్టుబడి పెట్టాయి. 25 శాతానికిపైగా వాటాను ఆయా సంస్థలకు విక్రయించడం ద్వారా మొత్తం రూ.1,18,318.45 కోట్లు గడించింది జియో.

ఈ మొత్తం పెట్టుబడుల్లో ఫేస్​బుక్ అతిపెద్ద మైనారిటీ వాటాదారుల్లో మొదటి స్థానంలో ఉండగా.. గూగుల్ రెండో స్థానాన్ని పొందనుంది.

ఇదీ చూడండి:మారుతీ కార్లలో లోపం- 1.34 లక్షల యూనిట్లు రీకాల్!