ఆండ్రాయిడ్ నుంచి కొత్త ఓఎస్‌ వెర్షన్ వస్తోందంటే చాలు.. అందులో ఫీచర్ల మాట అటుంచితే దానికి ఏం పేరు పెడతారా?అనే ఆసక్తే ఎక్కువ. ఇప్పటి వరకు విడుదల చేసిన ఓఎస్‌ వెర్షన్లకు పలు రకాల తీపి పదార్థాల పేర్లు పెడుతూ వస్తున్న గూగుల్.. ఈ సారి ఆ సంప్రదాయానికి తెరదించింది. కొత్తగా విడుదల చేయబోయే ఓఎస్‌ వెర్షన్కు సింపుల్‌గా ‘ఆండ్రాయిడ్ 10’ అని నామకరణం చేసింది. తీపి పదార్థాల పేర్లు పెట్టే ఆనవాయితీకి చరమగీతం పాడింది. దీంతో పాటు ఆండ్రాయిడ్ 10 లోగోను కూడా కొత్తగా రూపొందించింది. ఆండ్రాయిడ్ రోబో కూడా ఈసారి పేరు పైన ఉండేట్లుగా రూపొందించింది. లోగో రంగును కూడా ఆకుపచ్చ నుంచి నలుపు రంగుకు మార్చింది. కళ్లకు ఇంపుగా కనిపించేలా, దృష్టి లోపం ఉన్నవారిని దృష్టిలో ఉంచుకుని ఈ మార్పులు చేసినట్లు గూగుల్ తెలిపింది. రాబోయే కొన్నివారాల్లో ఆండ్రాయిడ్ 10ను అధికారికంగా విడుదల చేయనుంది.
ఆండ్రాయిడ్ పేర్ల సంప్రదాయానికి గూగుల్ బ్రేక్ - android
ఇప్పటి వరకు విడుదల చేసిన ఆండ్రాయిడ్ ఆపరేటింగ్ సిస్టమ్ వెర్షన్లకు తీపి పదార్థాల పేర్లు పెడుతూ వస్తోంది సెర్చ్ ఇంజిన్ దిగ్గజం గూగుల్. ఇప్పుడు ఈ సంప్రదాయాన్ని బ్రేక్ చేసింది. ఆండ్రాయిడ్ పదో వెర్షన్కు సింపుల్ పేరు పెట్టింది.
ఆండ్రాయిడ్ పేర్ల సంప్రదాయానికి గూగుల్ బ్రేక్
కొత్త ఓఎస్‌కు పేరు పెట్టే సంప్రదాయానికి తొలిసారి మార్పు చేసినట్లు ఆండ్రాయిడ్ ప్రొడక్ట్‌ మేనేజ్‌మెంట్‌ వైస్‌ ప్రెసిడెంట్‌ సమీర్‌ సమత్‌ ఓ ప్రకటనలో తెలిపారు. ప్రపంచవ్యాప్తంగా ప్రజలందరినీ దృష్టిలో ఉంచుకుని, అందరికీ అర్థమయ్యే విధంగా సింపుల్‌గా 'ఆండ్రాయిడ్ 10' అని నామకరణం చేసినట్లు చెప్పారు.
పాత పేర్లివే..
- ఆండ్రాయిడ్ 1.6- డోనట్‌
- ఆండ్రాయిడ్ 2.0, 2.1-ఎక్లెయిర్‌
- ఆండ్రాయిడ్ 2.2 - ఫ్రోయో
- ఆండ్రాయిడ్ 2.3, 2.4- జింజర్‌ బ్రెడ్‌
- ఆండ్రాయిడ్ 3.0, 3.1, 3.2- హనీ కోంబ్‌
- ఆండ్రాయిడ్ 4.0- ఐస్‌క్రీమ్‌ శాండ్‌విచ్‌
- ఆండ్రాయిడ్ 4.1 -జెల్లీబీన్‌
- ఆండ్రాయిడ్ 4.4-కిట్‌క్యాట్‌
- ఆండ్రాయిడ్ 5- లాలీపాప్‌
- ఆండ్రాయిడ్ 6- మార్ష్‌మాలో
- ఆండ్రాయిడ్ 7- నౌగట్‌
- ఆండ్రాయిడ్ 8- ఓరియో
- ఆండ్రాయిడ్9- పై
Last Updated : Sep 28, 2019, 1:03 AM IST