దేశీయ బడ్జెట్‌ విమానయాన సంస్థ 'గోఎయిర్'ను సిబ్బంది కొరత కష్టాలు వెంటాడుతున్నాయి. విమాన, కాక్పిట్ సిబ్బంది కొరతతో 18 విమానాలు రద్దు చేసినట్లు ఎయిర్లైన్స్ వర్గాలు వెల్లడించాయి. ముంబయి, గోవా, బెంగళూరు, దిల్లీ, శ్రీనగర్‌, జమ్ము, పట్నా, ఇండోర్‌, కోల్‌కతా నుంచి వెళ్లే 18 విమానాలను రద్దు చేసినట్లు తెలుస్తోంది.
గోఎయిర్ ఏమంటోందంటే..
విమాన సర్వీసుల అంతరాయంపై గోఎయిర్ అధికారిక ప్రకటనలో చాలా కారణాలను పేర్కొంది. 'వాతావరణం సరిగ్గా లేకపోవడం, మంచు ప్రభావం, పౌరసత్వ సవరణ చట్టానికి వ్యతిరేకంగా జరుగుతున్న ఆందోళనలు తదితర కారణాలతో గోఎయిర్ నెట్‌వర్క్‌లోని పలు విమాన సర్వీసులకు అంతరాయం ఏర్పడింది. దీంతో పాటు సిబ్బంది డ్యూటీ నిబంధనలు సర్వీసులపై ప్రభావం చూపిస్తున్నాయి' అని ప్రకటనలో తెలిపింది. ఎన్ని విమానాలు రద్దయ్యాయనే విషయాన్ని మాత్రం గోఎయిర్ అధికారికంగా వెల్లడించలేదు.