ఆటో సంక్షోభం: మరో 1,225 మంది ఉద్యోగులపై వేటు

ఆటో మొబైల్ దిగ్గజం జనరల్​ మోటార్స్.. భారీగా ఉద్యోగాల కోత విధిస్తోంది. సంస్థ ఉద్యోగులు చేస్తున్న సమ్మె రెండో వారానికి చేరిన నేపథ్యంలో.. మరో 1,225 మందిని విధుల నుంచి తొలగించింది.

ప్రముఖ ఆటోమొబైల్​ సంస్థ జనరల్ మోటార్స్ 1,225 మంది కార్మికులను విధుల నుంచి తప్పించింది. కెనడా, అమెరికాలో కార్మికుల సమ్మె రెండో వారానికి చేరిన నేపథ్యంలో ఈ నిర్ణయం తీసుకుంది.

కార్మికుల సమ్మెతో.. మొరైన్, ఒహాయోలో డీమాక్స్ ఇంజన్ ప్లాట్​లో 525 మందిని తప్పించింది. డీమాక్స్​ ప్లాంట్ జనరల్ మోటార్స్​కు అనుబంధ సంస్థ. ఇందులో 60 శాతం వాటా జనరల్ మోటార్స్​కు.. 40 శాతం వాటా ఇసూజూ సంస్థకు ఉంది.

కెనడాలోని మరో ప్లాంట్​లో 700 మంది కార్మికులను తాత్కాలిక సెలవులపై పంపినట్లు జనరల్ మోటార్స్ ఓ ప్రకటనలో తెలిపింది. ఇటీవలే కెనడాలోని ఒసావాలో ఉన్న కార్లు, ట్రక్కుల ప్లాంట్​ లో పని చేసే 2,000 మంది ఉద్యోగులకు తాత్కాలిక సెలవులివ్వడం గమనార్హం.

అమెరికాలోని..31 ప్లాంట్లలో పని చేస్తున్న 50,000 మంది ఉద్యోగులు గత వారం సమ్మెబాట పట్టారు. ఈ కారణంగా గత పదేళ్లలో ఎన్నడూ లేనంతగా ఉత్పత్తి పడిందిదని జనరల్ మోటార్స్ తెలిపింది. ఈ నేపథ్యంలో ఉద్యోగాల కోతకు దిగింది జనరల్ మోటార్స్.

చర్చలు విఫలం..

జనరల్ మోటార్స్​, యునైటెడ్​ ఆటో వర్కర్స్​ సంఘం మధ్య గత వారం చర్చలు జరిగాయి. కార్మికులతో కుదుర్చకున్న నాలుగేళ్ల ఒప్పందం ముగిసిన నేపథ్యంలో దాన్ని పునరుద్ధరించాలనే అంశంపై సాగిన సంప్రదింపులు ఫలవంతం కాలేదు.

ఇదీ చూడండి: పెట్రో​ ధరలు మరింత పైకి.. నేడు ఎంత పెరిగాయంటే!