యునిలీవర్​ షాక్​.. ఫేస్​బుక్, ట్విట్టర్​ షేర్లు కుదేలు

సామాజిక మాధ్యమాల్లో ప్రకటనలు నిలిపివేయనున్నట్లు యునిలీవర్ నిర్ణయం తీసుకున్న నేపథ్యంలో ఫేస్​బుక్​, ట్విట్టర్​ షేర్లు శుక్రవారం భారీగా నష్టపోయాయి. రెండు కంపెనీలు 7 శాతానికిపైగా నష్టాన్ని మూటగట్టుకున్నాయి. ఇంతకీ యునిలీవర్ నిర్ణయానికి కారణాలు ఏంటంటే..

సామాజిక మాధ్యమ దిగ్గజాలు ఫేస్​బుక్, ట్విట్టర్​ షేర్లు అమెరికా మార్కెట్లలో శుక్రవారం భారీగా కుదేలయ్యాయి. ఫేస్​బుక్, ట్విట్టర్​, ఇన్​స్టాగ్రామ్​లలో ఈ ఏడాది చివరి నుంచి ప్రకటనలు నిలిపివేయనున్నట్లు బెన్​&జెర్రీ ఐస్​క్రీమ్, డౌవ్​సోప్​ల మాతృసంస్థ యునిలీవర్ తెలపడం ఇందుకు కారణమైంది. విద్వేషపూరిత ప్రసంగాలకు వ్యతిరేకంగా తమ నిరసన తెలిపేందుకు ఈ నిర్ణయం తీసుకున్నట్లు యునిలివర్ వెల్లడించింది.

యునిలీవర్​ ప్రకటన తర్వాత ఫేస్​బుక్, ట్విట్టర్ షేర్లు 7 శాతానికిపైగా నష్టపోయాయి.

తాజా నిర్ణయంతో.. ఇప్పటికే ప్రకటనలు నిలిపేసి బాయ్​కాట్ ఫేస్​బుక్​ ఉద్యమం చేస్తున్న సంస్థల జాబితాలో యునిలీవర్​ చేరింది. హింసాత్మక, జాత్యహంకార కంటెంట్​ను నిరోధించేందుకు.. ఫేస్​బుక్​పై ఒత్తిడి తేవడం ఈ ఉద్యమం ముఖ్య ఉద్దేశం.

ఈ విషయంపై స్పందించేందుకు ఫేస్​బుక్ నిరాకరించింది. ట్విట్టర్ మాత్రం తమ భాగస్వామ్యుల నిర్ణయాలను గౌరవిస్తూ.. వారితో కలిసి పని చేస్తామని వెల్లడించింది.

ఇదీ చూడండి:ఆగని పెట్రో వాత.. 21వ రోజూ ధరలు పైపైకి