కరోనా మహమ్మారి వ్యాప్తిని నిరోధించేందుకు కేంద్రం విధించిన దేశవ్యాప్త లాక్‌డౌన్ ఆర్థిక వ్యవస్థపై తీవ్ర ప్రభావం చూపే అవకాశముందని నిపుణులు, ఆర్థికవేత్తలు అభిప్రాయపడుతున్నారు. లాక్‌డౌన్ కారణంగా సుమారు రూ.9 లక్షల కోట్ల మేర నష్టం వాటిల్లే అవకాశముందని అంచనా వేస్తున్నారు. దేశ జీడీపీలో ఇది 4 శాతం ఉంటుందని చెబుతున్నారు.
వృద్ధిరేటు 3.5 శాతమే!
మూడు వారాల లాక్‌డౌన్ కారణంగా రూ.6.75 లక్షల కోట్ల మేర నష్టం వాటిల్లుతుందని బ్రిటిష్ బ్రోకరేజ్ సంస్థ బార్ల్కేస్ అంచనా వేసింది. మహారాష్ట్ర సహా పలురాష్ట్రాలు విధించిన లాక్‌డౌన్ కారణంగా ఈ నష్టం మరింత పెరుగుతుందని హెచ్చరించింది. 2020-21 ఆర్థిక సంవత్సరానికి సంబంధించి వృద్ధిరేటు అంచనాలను 1.7 శాతం తగ్గించి 3.5 శాతానికి పరిమితం చేసింది.
ఆ విషయంలో భేష్‌..
మిగతా దేశాలకంటే కేంద్ర ప్రభుత్వం త్వరితగతిన స్పందించిందని దేశీయ బ్రోకరేజీ సంస్థ ఎంకే తెలిపింది. ఆర్థిక వ్యవస్థపై ప్రభావం పడకుండా చర్యలు తీసుకోవాలని ప్రభుత్వాని కోరింది. ఆర్థిక ప్యాకేజీని ప్రకటించి చిన్న తరహా వ్యాపారాలకు రుణాల మంజూరును సులభతరం చేయడం, రుణాల పునర్‌వ్యవస్థీకరణ, నగదు బదిలీ తదితర చర్యలు చేపడితే ప్రయోజనం ఉంటుందని సూచించింది.