Elon Musk about Tesla in India: భారత్లో టెస్లా కార్ల ప్రవేశంపై.. ఆ సంస్థ సీఈఓ, వ్యవస్థాపకుడు ఎలాన్ మస్క్ సంచలన ట్వీట్ చేశారు. 'ఇప్పటికీ ప్రభుత్వంతో ఎన్నో సవాళ్లను ఎదుర్కొంటున్నట్లు' పోస్ట్ చేయగా.. ఇది చర్చనీయాంశమైంది. సవాళ్లు ఉన్నాయన్న మస్క్ ఆరోపణలను భారత ప్రభుత్వ వర్గాలు ఖండించాయి. ఈ మేరకు పలు మీడియా కథనాలు పేర్కొన్నాయి.
సామాజిక మాధ్యమాల ద్వారా ప్రభుత్వంపై మస్క్ ఒత్తిడి తెచ్చేందుకు ప్రయత్నిస్తున్నారని సదరు ప్రభుత్వ అధికారులు విమర్శించారు. అయితే తాము ఎలాంటి ఒత్తిళ్లకు తలొగ్గమని మస్క్ వ్యాఖ్యలను తిప్పికొట్టినట్లు సమాచారం. భారత్లో కార్ల తయారీకి కట్టుబడి ఉండకుండా.. కార్లపై దిగుమతి సుంకాన్ని తగ్గించమని కోరడం సమంజసం కాదని అన్నట్లు తెలుస్తోంది.
ఇదీ జరిగింది..
Tesla In India: భారత్లో టెస్లా కార్ల విడుదల ఎప్పుడు? అని ట్విట్టర్ వేదికగా ఓ యూజర్ మస్క్ను అడిగాడు.
'భారత్లో టెస్లా విడుదలపై ఏమైనా అప్డేట్ ఉందా? టెస్లా కార్లు చాలా బాగుంటాయి. ప్రపంచంలో ఎక్కడైనా ఉండేందుకు వీటికి అర్హత ఉంది.' అని మస్క్ను ట్యాగ్ చేస్తూ సదరు నెటిజెన్ ట్వీట్ చేశాడు.
దీనికి స్పందించిన మస్క్.. 'ప్రభుత్వంతో ఎన్నో సవాళ్లను ఎదుర్కొంటూ ఇప్పటికీ దీనిపై ప్రయత్నాలు చేస్తున్నాం' అన్నారు. ఈ ట్వీట్ కాస్తా వైరల్గా మారింది.
నెటిజెన్ ట్వీట్కు మస్క్ రిప్లై సుంకాన్ని తగ్గిస్తేనే..
జనాభాపరంగా ప్రపంచంలోనే రెండో అతిపెద్ద విపణి కలిగిన భారత్లోకి ప్రవేశించేందుకు టెస్లా కొంత కాలంగా కసరత్తు చేస్తోంది. అయితే, సంస్థ వ్యవస్థాపకుడు ఎలాన్ మస్క్ ఓ షరతు విధించారు. తొలుత విదేశాల్లో తయారైన తమ కార్లను భారత్లో విక్రయిస్తామని తెలిపారు. తర్వాతే స్థానికంగా తయారీ యూనిట్‌ను నెలకొల్పుతామని తేల్చిచెప్పారు. అంతకంటే ముందు కార్ల దిగుమతిపై ఉన్న సుంకాన్ని తగ్గించాలని విజ్ఞప్తి చేశారు.
ఈ మేరకు గతేడాది కేంద్ర ప్రభుత్వానికి లేఖ కూడా రాశారు. దీనిపై కేంద్ర భారీ పరిశ్రమల శాఖ స్పందించింది. భారత్లో తయారీ ప్రారంభించాకే సుంకాల తగ్గింపు విషయం పరిశీలిస్తామని స్పష్టం చేసింది. ఇప్పటి వరకు ఏ కంపెనీకీ ప్రత్యేక రాయితీలు ఇవ్వలేదని తెలిపింది. టెస్లాకు మాత్రమే మినహాయింపులు ఇవ్వడం వల్ల తప్పుడు సందేశం వెళుతుందని వివరించింది. ఇప్పటికే భారత్లో బిలియన్ల డాలర్లు పెట్టుబడులు పెట్టినవారికి ప్రతికూల సంకేతాలు అందుతాయని పేర్కొంది.
అయితే 2021 జనవరిలో భారత ఆటోమొబైల్ మార్కెట్లోకి ప్రవేశించిందనే సంకేతాలు అందిస్తూ.. టెస్లా తన శాఖను బెంగళూరులో ప్రారంభించింది. టెస్లా ఇండియా మోటార్స్ అండ్ ఎనర్జీ ప్రైవేట్ లిమిటెడ్ పేరుతో రిజిస్టర్ అయినట్లు రెగ్యులేటరీ ఫైలింగ్లో తెలిపింది.
ఇవీ చూడండి: 2025 నాటికి భారత్లో 'టెస్లా' కార్ల ఉత్పత్తి!
టెస్లా నుంచి 'పై' స్మార్ట్‌ఫోన్‌.. ఇక అంతరిక్షం నుంచి హలో!
లెజెండ్స్ బైక్ 'యెజ్డీ' మళ్లీ వచ్చేసింది- ధరలు ఇలా..
