మార్చిలో డాక్టర్​ రెడ్డీస్​ కొవిడ్ టీకా రిలీజ్​!

భారత్​లో 'స్పుత్నిక్ వీ' టీకాను అత్యవసర వినియోగానికి అందుబాటులోకి తెచ్చే దిశగా వడివడిగా అడుగులేస్తోంది డాక్టర్ రెడ్డీస్. ఫిబ్రవరిలో డోసింగ్ ప్రక్రియ పూర్తి చేసి.. మార్చిలో వ్యాక్సిన్ అందుబాటులోకి తీసుకురావాలని భావిస్తున్నట్లు సంస్థ ఉన్నతాధికారి ఒకరు వెల్లడించారు.

అత్యవసర వినియోగ అనుమతులు పొందిన అనంతరం.. మార్చిలో కొవిడ్ వ్యాక్సిన్ 'స్పుత్నిక్ వీ'ను భారత్​లో విడుదల చేసేందుకు ప్రణాళికలు వేస్తున్నట్లు డాక్టర్ రెడ్డీస్ ప్రకటించింది. ప్రస్తుత ఆర్థిక సంవత్సర క్యూ3 ఫలితాల ప్రకటన కార్యక్రమంలో సంస్థ ఏపీఐ, ఫార్మా సూటికల్ విభాగ సీఈఓ దీపక్ సాప్రా ఈ వివరాలు వెల్లడించారు. ఇప్పటికే మూడో దశ క్లినికల్ ట్రయల్స్ 70 శాతం పూర్తయ్యాయని తెలిపారు. ఫిబ్రవరిలో డోసింగ్ పూర్తవుతుందని.. తదనంతరం అత్యవసర ఉపయోగం కోసం దరఖాస్తు చేసుకోనున్నట్లు వెల్లడించారు.

2020-21 క్యూ3లో కంపెనీ.. నికర లాభం రూ.19.8 కోట్లుగా నమోదైంది. గత ఏడాది ఇదే సమయంలో కంపెనీ ఏకీకృత నికర లాభం రూ.527.4 కోట్లుగా ఉంది. క్యూ3లో రూ. 4,930 కోట్ల ఆదాయం గడించింది కంపెనీ.

ఇదీ చూడండి:'వచ్చే రెండేళ్లలో దేశార్థికం పరుగులు'