కరోనా ఎఫెక్ట్​: ఆ సంస్థ ఉద్యోగుల జీతాల్లో 50 శాతం కోత

దేశీయ విమానయాన సంస్థ గోఎయిర్​ మరో కీలక నిర్ణయం తీసుకుంది. కరోనా సంక్షోభం కారణంగా తమ సంస్థలో పనిచేసే ఉద్యోగుల వేతనంలో 50 శాతం కోత విధిస్తున్నట్లు ప్రకటించింది.

ఉద్యోగుల వేతనాల్లో కోత విధిస్తూ కీలక నిర్ణయం తీసుకుంది దేశీయ విమానయాన సంస్థ గోఎయిర్. కరోనా సంక్షోభం కారణంగా ఆ సంస్థలో పనిచేసే సిబ్బంది వేతనంలో 50శాతం కోత పెట్టనుంది. ఈ మేరకు గోఎయిర్​​ సీఈఓ వినయ్​ డ్యూబ్​ ఓ ప్రకటనలో తెలిపారు.

కరోనా వైరస్​ ప్రభావంతో ఇప్పటికే పలు విమాన సర్వీసులు రద్దయినందున ఆదాయాలు క్షీణించాయి. ఇదివరకే కొందరు పైలట్లను తొలగించగా.. మరికొందరు ఉద్యోగులకు వేతనంలేని సెలవులను ప్రకటించింది గోఎయిర్. అయితే ఈ చర్యలన్నీ తాత్కాలికమేనని.. వైరస్​ సవాళ్లను విజయవంతంగా ఎదుర్కొనేందుకే ఈ నిర్ణయం తీసుకున్నట్లు చెప్పారు వినయ్​.

వైరస్​ వ్యాప్తిని అరికట్టేందుకు మహారాష్ట్ర ప్రభుత్వం కార్యాలయాల్ని మూసివేసింది. సంస్థ అవసరాల నిమిత్తం.. ఉద్యోగులకు ఇంటి నుంచే కార్యకలాపాలు నిర్వహించేలా ఏర్పాటుచేశామని వినయ్​ అన్నారు.

ఇది చదవండి:స్టాక్‌ మార్కెట్లు మూసేస్తే.. ప్రత్యామ్నాయం ఉందా?