జీఎస్టీ చెల్లించేవారికి కేంద్రం లాటరీ పథకం!

జీఎస్టీ చెల్లింపుదారుల కోసం లాటరీ పథకాన్ని తీసుకొచ్చేందుకు కేంద్రం కసరత్తు చేస్తోంది. పన్ను వసూళ్లు పెంచే దిశగా ఈ విధానాన్ని అమలు చేయాలని భావిస్తోంది. త్వరలోనే ఈ కొత్త ప్రతిపాదన జీఎస్టీ మండలి ముందుకు రానున్నట్లు తెలుస్తోంది.

వస్తు సేవల పన్ను (జీఎస్టీ) వసూళ్లు పెంచేందుకు.. వినియోగదారులకు లాటరీ పథకాన్ని తీసుకురావాలని ఆర్థిక మంత్రిత్వశాఖ భావిస్తోంది. పన్ను ఎగవేతలను అరికట్టి, నిఘా పటిష్ఠం చేసేందుకు ఈ పథకం తోడ్పడుతుందని ఓ సీనియర్​ అధికారి తెలిపారు.

ఈ పథకం ద్వారా రోజువారీ, నెలవారీ పద్ధతిలో లాటరీలు తీయనున్నట్లు వివరించారు. ఏదైనా కొనుగోలు జరిపి, జీఎస్టీ చెల్లించిన వినియోగదారులకు ఈ పథకం వర్తించనున్నట్టు వెల్లడించారు.

విజేతల ఎంపిక ఇలా..

ఏదైనా వస్తువు, సేవకు జీఎస్టీతో సహా డబ్బులు చెల్లించాక వ్యాపారుల నుంచి వినియోగదారులు బిల్లు తీసుకోవాలి. ఆ బిల్లును ఓ ప్రత్యేక పోర్టల్ లేదా యాప్ ద్వారా అప్​లోడ్ చేయాలి. యాప్​ ద్వారా ఫోన్​ నెంబర్​, వ్యాపారుల జీఎస్టీ సంఖ్య వంటివి ఆటోమేటిక్​గా తీసుకుంటారు. విజేతల ఎంపిక కూడా ఆన్​లైన్​లోనే జరుగుతుంది.
లాటరీ పథకం కోసం ప్రత్యేక యాప్​ లేదా పోర్టల్​ను రూపొందించాల్సి ఉందని ఆ అధికారి చెప్పారు. అధికారుల స్థాయిలో ఈ పథకంపై ఒక అవగాహనకు వచ్చిన తర్వాత.. జీఎస్టీ మండలి ముందు ఈ కొత్త ప్రతిపాదనను ఉంచనున్నట్లు పేర్కొన్నారు.

ఎంత ఇస్తారు..?

ఈ పథకంతో జీఎస్టీ వసూళ్లు పెరుగుతాయని అధికారులు భావిస్తున్నారు. లాటరీ బహుమతి వినియోగదారుల సంక్షేమనిధి నుంచి వస్తుందని తెలిపారు. అయితే... బిల్లు విలువ కనీసం ఎంత ఉండాలి, బహుమతిగా ఎంత వస్తుందో ఇంకా నిర్ణయించాల్సి ఉందని చెప్పారు.

దిల్లీలో గతంలోనే...

ఈ పథకం.. గతంలో దిల్లీ ప్రభుత్వ ప్రవేశపెట్టిన 'బిల్​ బనావో, ఇనామ్ పావో' స్కీంను పోలి ఉండనున్నట్లు ఆ అధికారి తెలిపారు. దిల్లీ సర్కార్​ పథకంలో... వ్యాట్​ చెల్లించిన వారు లాటరీకి అర్హులు. వారికి తాము చెల్లించిన పన్నుకు ఐదు రెట్లు(రూ.50వేలు మించకుండా) నగదు బహుమతి ఇచ్చేవారు.

ఇదీ చూడండి:ఆన్​లైన్​​ టోకరా: రూ.800 కుర్తాకు రూ.80వేలు దోపిడీ