ఎస్​ బ్యాంక్​ వ్యవస్థాపకుడిపై 'మోసం, అవినీతి' కేసులు

సంక్షోభంలో చిక్కుకున్న ఎస్​ బ్యాంక్​ వ్యవస్థాపకుడు రానా కపూర్​పై రెండు కేసులు నమోదు చేసింది సీబీఐ. మరిన్ని కీలక ఆధారాల కోసం అన్వేషిస్తోంది. ఇదే విషయంపై ఇప్పటికే ఎన్​ఫోర్స్​మెంట్ డైరెక్టరేట్.. రానా కపూర్​ను అదుపులోకి తీసుకుంది. లండన్​ వెళ్లేందుకు ముంబయి విమానాశ్రయానికి వచ్చిన రానా కుమార్తె రోష్నీ కపూర్​ను అడ్డుకున్నారు పోలీసులు.

ఎస్​ బ్యాంక్ సంక్షోభంపై కేంద్ర దర్యాప్తు సంస్థ (సీబీఐ) దర్యాప్తు ప్రారంభించింది. బ్యాంక్​ వ్యవస్థాపకుడు రానా కపూర్​పై రెండు(మోసం, అవినీతి) కేసులు నమోదు చేసింది. ఈ కేసులోని పలు కీలక ఆధారాల కోసం సంబంధిత పత్రాలను సేకరిస్తున్నట్లు సమాచారం. అయితే.. బ్యాంక్​ సంక్షోభంపై దర్యాప్తు విషయాన్ని గోప్యంగా ఉంచాలని సీబీఐ భావిస్తున్నట్లు తెలుస్తోంది.

డీహెచ్​ఎఫ్​ఎల్​, ఎస్​ బ్యాంక్ మధ్య సంబంధంపై సీబీఐ దర్యాప్తు చేయనుందని విశ్వసనీయ వర్గాల సమాచారం.

రానా కపూర్​ కుమార్తెను అడ్డుకున్న పోలీసులు..

రానా కపూర్​ కుటుంబం చుట్టు ఎస్​ బ్యాంక్ సంక్షోభం ఉచ్చు బిగుస్తోంది. లండన్​ వెళ్లేందుకు ముంబయి విమానాశ్రయానికి వచ్చిన ఆయన కుమార్తె రోష్ని కపూర్​ను పోలీసులు అడ్డుకున్నారు. ఇప్పటికే.. రానా కుటుంబ సభ్యులందరికీ లుకౌట్​ నోటీసులు జారీ చేసింది ఈడీ. రానా భార్య బిందు కపూర్​, కుమార్తెలు రాఖీ కపూర్​, రాధా కపూర్​, రోష్నీ కపూర్​లు దేశం విడిచి వెళ్లకూడదని ఆదేశించింది. ​ ఈ నేపథ్యంలోనే బ్రిటీష్​ ఎయిర్​వేస్​లో లండన్​ వెళ్లేందుకు వచ్చిన రోష్నీ కపూర్​ను అడ్డుకున్నారు పోలీసులు.

రానా కపూర్ అరెస్టు..

ఎస్​ బ్యాంక్ సంక్షోభం నేపథ్యంలో ఇప్పటికే బ్యాంకు వ్యవస్థాపకుడు రానా కపూర్​ను అదుపులోకి తీసుకుంది ఎన్​ఫోర్స్​మెంట్ డైరెక్టరేట్​ (ఈడీ). ఆదివారం సెలవు దినాన ప్రత్యేకంగా సమావేశమైన కోర్టు 11వ తేదీ వరకు ఆయనను కస్టడీలో ఉంచేందుకు అనుమతించింది.

రానా కపూర్ ఇంట్లో శుక్రవారం రాత్రి సోదాలు చేసింది ఈడీ. 20 గంటల పాటు ఆయనను విచారించింది. ఇవాళ ఉదయం 3 గంటల సమయంలో మనీలాండరింగ్ నిరోధక చట్టం ప్రకారం అరెస్టు చేసింది. అనంతరం కోర్టులో ప్రవేశపెట్టింది. మరింత విచారణ కోసం తమ కస్టడీకి అప్పగించాలని కోర్టును అభ్యర్థించింది. ఈడీ విజ్ఞప్తిపై సానుకూలంగా స్పందించింది ముంబయి కోర్టు.

ఇదీ చూడండి:ఆ కారణాలతో ఈ వారమూ ఒడుదొడుకులే..!