ప్రభుత్వ రంగ టెలికాం సంస్థల బీఎస్ఎన్ఎల్, ఎంటీఎన్ఎల్ సంస్థలను అప్పుల నుంచి గట్టెక్కించేందుకు ప్రభుత్వం ఇటీవల భారీ ప్యాకేజీని ప్రకటించింది. ఉద్యోగుల కోసం స్వచ్ఛంద పదవీ విరమణ (వీఆర్ఎస్) పథకాన్ని తీసుకువచ్చింది.
ఈ పథకాన్ని మొత్తం 70,000 నుంచి 80,000 మంది ఉద్యోగులు వినియోగించుకునేందుకు ఆసక్తిగా ఉన్నట్లు బీఎస్ఎన్ఎల్ అంచనా వేస్తోంది. ఫలితంగా వేతన బిల్లులో రూ.7,000 కోట్ల మిగులు ఏర్పడుతుందని ఆశిస్తోంది.
డిసెంబర్ 3 వరకు గడువు..
నవంబర్ 4న ప్రారంభమైన ఈ పథకం వచ్చే నెల 3 వరకు అందుబాటులో ఉంటుందని బీఎస్ఎన్ఎల్ ఛైర్మన్, ఎండీ పి.కె.పర్వార్ తెలిపారు. వీఆర్ఎస్ పూర్తి వివరాలు ఉద్యోగులకు తెలిపేందుకు క్షేత్ర స్థాయి విభాగాలకు ఇప్పటికే ఆదేశాలు జారీ చేసినట్లు వెల్లడించారు.
వారంతా అర్హులే..
వీఆర్ఎస్-2019 పథకానికి శాశ్వత ఉద్యోగులంతా అర్హులని పేర్కొంది యాజమాన్యం. బీఎస్ఎన్ఎల్ నుంచి ఇతర సంస్థలకు, ఇతర విభాగాలకు డిప్యుటేషన్పై వెళ్లిన ఉద్యోగులూ వీఆర్ఎస్కు అర్హులేనని స్పష్టం చేసింది.
సంస్థలో పని చేస్తూ 50 ఏళ్లు దాటిన ఉద్యోగులంతా వీఆర్ఎస్ పథకాన్ని వినియోగించుకోవచ్చని యాజమాన్యం తెలిపింది. ఈ ప్రాతిపాదికన దేశవ్యాప్తంగా ఉన్న లక్షా 50 వేల మంది బీఎస్ఎన్ఎల్ ఉద్యోగుల్లో.. లక్ష మందికి వీఆర్ఎస్కు అర్హత ఉన్నట్లు వెల్లడించింది.
వీఆర్ఎస్కు అర్హత కలిగిన ఉద్యోగులు.. వారు పని చేసిన ప్రతి ఏడాదికి 35 రోజుల చొప్పున.. మిగిలిన ఉద్యోగ సంవత్సరాలకు 25 రోజుల చొప్పున ఎక్స్గ్రేషియా పొందుతారు.
బీఎస్ఎన్ఎల్తో పాటే ఎంటీఎన్ఎల్ తమ ఉద్యోగులకు వీఆర్ఎస్ పథకాన్ని ప్రకటించింది. 50 ఏళ్లు దాటిన శాశ్వత ఉద్యోగులు ఇందుకు అర్హులని వెల్లడించింది ఆ సంస్థ ఉద్యోగులకు తెలిపింది.
ఈ రెండు ప్రభుత్వ సంస్థలను విలీనం చేసేందుకు కేంద్ర కేబినెట్ ఇటీవల ఆమోదం ముద్ర వేసిన విషయం తెలిసిందే. త్వరలోనే ఈ ప్రక్రియ ప్రారంభమయ్యే అవకాశముంది.
ఇదీ చూడండి: రూ.39వేల దిగువకు పసిడి.. నేడు ఎంత తగ్గిందంటే?
