ఐఫోన్​ ఉత్పత్తి, అమ్మకాలకు కరోనా చెక్​..!

కరోనా మహమ్మారి విజృంభణతో ఐఫోన్​ ఉత్పత్తి, అమ్మకాలు నెమ్మదించాయని ఎలక్ట్రానిక్ దిగ్గజం యాపిల్​ తెలిపింది. ఐఫోన్​ ఉత్పత్తి కేంద్రాలన్నీ చైనాలోనే ఉండటమే ఇందుకు కారణమని పేర్కొంది.

కరోనా వైరస్​ కారణంగా ఐఫోన్ల ఉత్పత్తి, అమ్మకాలపై ప్రభావం పడుతుందని యాపిల్ సంస్థ తెలిపింది. రెండో త్రైమాసిక ఆర్థిక మార్గదర్శకాలను అందుకోలేకపోతున్నట్టు పెట్టుబడిదారులను హెచ్చరించింది.

"కరోనా వ్యాప్తి మొదలైన హుబే రాష్ట్రానికి దగ్గరలోనే ఐఫోన్​ ఉత్పత్తి కేంద్రాలన్నీ ఉన్నాయి. ప్రస్తుతం అన్నింటినీ పునఃప్రారంభించాం. కానీ ఉత్పత్తి నెమ్మదిగా సాగుతోంది.

సంస్థలో పనిచేసేవారి ఆరోగ్యం కూడా ముఖ్యమే. మా ఉత్పత్తిదారులతో పాటు ప్రభుత్వ ఆరోగ్య నిపుణులతో కలిసి పనిచేస్తున్నాం. "

-యాపిల్ సంస్థ ప్రకటన

కరోనా కారణంగా ఐఫోన్ల ఉత్పత్తితో పాటు చైనాలో డిమాండ్ కూడా దెబ్బతిందని సంస్థ ప్రకటించింది. చైనాలోని యాపిల్​ రిటైల్ దుకాణాలను చాలా వరకు మూసివేయడమే కారణమని తెలిపింది. అమెరికా, ఐరోపా తర్వాత యాపిల్​కు మూడో అతిపెద్ద మార్కెట్ చైనా.

రెండో త్రైమాసికంలో 63 నుంచి 67 బిలియన్ డాలర్ల రెవెన్యూ సాధిస్తామని యాపిల్​ జనవరి 28న అంచనాలను ప్రకటించింది. చైనాను మినహాయిస్తే ఇతర దేశాల్లో ఐఫోన్​ డిమాండ్​ బాగానే ఉన్నట్లు తెలిపింది సంస్థ.

కరోనా మహమ్మారి..

కరోనా వైరస్​ మహమ్మారి వల్ల చైనాలో 1,860మంది మరణించారు. మృతుల సంఖ్య రోజురోజుకూ తగ్గుతున్నప్పటికీ... ప్రపంచదేశాల్లో ఆందోళన కొనసాగుతూనే ఉంది.