యాపిల్ నూతన సేవలను వివరిస్తున్నటిమ్ కుక్ ప్రముఖ టెక్ దిగ్గజం యాపిల్ నుంచి ఎప్పుడెప్పుడా అని ఎదురు చూస్తున్న వీడియో స్ట్రీమింగ్ సేవలను ఆ సంస్థ ఆవిష్కరించింది.కాలిఫోర్నియాలోని యాపిల్ ప్రధాన కార్యాలయంలో ఏర్పాటు చేసిన కార్యక్రమంలో యాపిల్ ఈ ప్రకటన చేసింది.
స్మార్ట్ఫోన్ల అమ్మకాలు ఇటీవల తగ్గుముఖం పట్టిన కారణంగా యాపిల్ ఇతర సేవలపై దృష్టి సారించింది. ఇందులో భాగంగా డిజిటల్ కంటెంట్ను అందుబాటులోకి తెచ్చింది ఈ టెక్ దిగ్గజం.
ఇవేకాక 'యాపిల్ న్యూస్ ప్లస్', గేమింగ్ కోసం 'యాపిల్ ఆర్కేడ్' సేవలను అందుబాటులోకి తెచ్చింది ఐ ఫోన్ తయారీ సంస్థ.
ప్రకటనలు లేకుండా అందించే.. 'యాపిల్ టీవీ ప్లస్' సేవలను కూడా ఈ ఏడాదిలో 100 దేశాల్లో ప్రారంభించనున్నట్లు పేర్కొంది. ఈ సర్వీసులు చందాదార్లకు మాత్రమే అందుబాటులో ఉంటాయి. ఇందులో డిజిటల్ కంటెంట్ కోసం భారీగా ఖర్చు చేయనున్నట్లు వెల్లడించింది యాపిల్.
ఈ నిర్ణయంతో ఇప్పటికే వీడియో సేవల్లో దూసుకుపోతున్న నెట్ఫ్లిక్స్, అమెజాన్ ప్రైమ్, హులు వంటి సంస్థలతో పోటీకి సిద్ధమైంది. వాటితో పోలిస్తే సొంత కంటెట్పై యాపిల్ భారీగా పెట్టుబడులు పెట్టనుంది.
న్యూస్ ప్లస్ సేవలను అమెరికా, కెనడాల్లో అందుబాటులోకి తెచ్చింది యాపిల్. ఆంగ్ల, ఫ్రెంచ్ భాషల్లో ఈ సేవలు అందుబాటులో ఉన్నట్లు పేర్కొంది. ఈ ఏడాది చివరినాటికి బ్రిటన్, ఆస్ట్రేలియాల్లో ఈ సేవలను తీసుకురానున్నట్టు వెల్లడించింది. నెలకు 9.99 డాలర్ల నెలసరి చందాతో ఈ సేవలు అందించనుంది యాపిల్.
ఫోన్లు సహా ఇతర డివైజ్ల కోసం 'యాపిల్ ఆర్కేడ్' పేరుతో గేమింగ్ సేవలను ప్రారంభించింది యాపిల్. వివిధ సబ్స్క్రిప్షన్ ప్లాన్లతో వీటిని అందుబాటులోకి తెస్తామని, ధరలను త్వరలో ప్రకటిస్తామని తెలిపింది.
"సృజనాత్మకత శక్తిని మేము బలంగా నమ్ముతాం. గొప్ప కథలు ప్రపంచాన్ని మారుస్తాయి. ఏదైనా కొత్తగా చేసి మన సమాజానికి, సంస్కృతికి ముఖ్యమైనది అందివ్వాలని భావిస్తున్నాం " - నూతన సర్వీసుల ఆవిష్కరణ కార్యక్రమంలోయాపిల్ సీఈఓ టిమ్ కుక్
ప్రకటనకర్తలు చందాదారుల వాడుక విధానాన్ని గుర్తించలేరని, ఇది పటిష్టమైన గోప్యతతో కూడిందని యాపిల్ పేర్కొంది.
అదనపు సేవల్లో భాగంగా గోల్డ్ మన్ శాక్స్తో కలిసి క్రెడిట్ కార్డ్ సేవలను యాపిల్ పే ద్వారా అందిస్తున్నట్లు సంస్థ వెల్లడించింది. అమెరికాలో ఈ డిజిటల్ సేవలు అందుబాటులో ఉండనున్నట్లు యాపిల్ తెలిపింది.
