భారత దిగ్గజ వ్యాపారవేత్తలు మహీంద్రా గ్రూప్ ఛైర్మన్ ఆనంద్ మహీంద్రా, అడోబ్ ఛైర్మన్ శాంతను నారాయణ్ ప్రతిష్టాత్మక పురస్కారానికి ఎంపికయ్యారు. ఈ ఏడాది లీడర్షిప్ అవార్డులకు వీరిద్దరిని ఎంపిక చేసినట్లు తెలిపింది అమెరికా-భారత్ వ్యూహాత్మక భాగస్వామ్య ఫోరం(యూఎస్‌ఐఎస్‌పీఎఫ్). ఇరుదేశాల ద్వైపాక్షిక సంబంధాలను మెరుగుపర్చే దిశగా వీరు ప్రయత్నిస్తున్నట్లు ఆ సంస్థ పేర్కొంది.
ఆగస్టు 31 నుంచి "యూఎస్-ఇండియా వీక్: నావిగేటింగ్ న్యూ ఛాలెంజెస్" పేరుతో జరగనున్న మూడో వార్షిక నాయకత్వ సదస్సులో ఈ అవార్డును ప్రదానం చేయనున్నారు. వర్చువల్గా జరగనున్న ఈ కార్యక్రమంలో యూఎస్‌ఐఎస్‌పీఎఫ్ బోర్డు సభ్యులు, 21 మంది ఫార్చూన్-500 సీఈఓలు, ఇరు దేశాల ప్రభుత్వాధికారులు పాల్గొననున్నారు. సెప్టెంబర్ 3న కార్యక్రమం ముగియనుంది.
"యూఎస్-ఇండియా ద్వైపాక్షిక వాణిజ్యాన్ని బలపరిచే దిశగా పనిచేస్తున్న ఇద్దరు పారిశ్రామికవేత్తలకు 2020- లీడర్షిప్ అవార్డును ప్రకటించడం ఆనందంగా ఉంది. ముఖ్యంగా ప్రపంచ ఆర్థికవ్యవస్థ, వ్యాపారాలు అనిశ్చితిలో ఉన్నప్పుడు వీరిద్దరూ నిలబెట్టేందుకు సామర్థ్యం మేరకు కృషి చేస్తున్నారు. ఇరుదేశాల ద్వైపాక్షిక సంబంధాలు సానుకూలంగా సాగడంలో కీలకపాత్ర పోషిస్తున్నారు ఆనంద్ మహీంద్రా. డిజిటల్ టెక్నాలజీలో శాంతను నారాయణ్ మార్గదర్శకాలు కమ్యూనిటీలకు మద్దతు ఇవ్వడం, స్టార్టప్‌లపై ప్రభావం వల్ల ప్రభుత్వాలకు మేలు జరుగుతోంది. ఇది పౌర సమాజంతో పాటు ద్వైపాక్షిక సంబంధాలకూ చాలా కీలకం" అని యూఎస్‌ఐఎస్‌పీఎఫ్ ఛైర్మన్ జాన్ ఛాంబర్స్ వెల్లడించారు.
ఈ సదస్సులో ఇరుప్రాంతాల మధ్య ద్వైపాక్షిక సహకారం మరింతగా పెంపొందించుకునే విషయంపై చర్చించనున్నారు. వాణిజ్యం, పెట్టుబడి సంబంధాలు, వ్యూహాత్మక శక్తి సంబంధాలు, ప్రపంచ సరఫరా గొలుసులో భారతదేశ పాత్ర, ఫిన్‌టెక్తో భాగస్వామ్యం, హెల్త్‌కేర్, టెక్నాలజీలో సహకారం, ఎఫ్డీఐలను ఆకర్షించడానికి న్యాయమైన పన్ను పాలనను వంటి అంశాలపై చర్చించనున్నట్లు తెలిపింది యూఎస్‌ఐఎస్‌పీఎఫ్.
