ప్రపంచవ్యాప్తంగా అత్యంత శక్తిమంతమైన 121 మంది ముఖ్య కార్య నిర్వహణ అధికారులతో 'సీఈఓ వరల్డ్' జాబితాను వెలువరించింది. ఇందులో భారతీయులు 10 మంది చోటు సంపాదించారు. రిలయన్స్ ఇండస్ట్రీస్ అధినేత ముకేశ్ అంబానీ, ఇండియన్ ఆయిల్ కార్పొరేషన్‌ సీఈఓ సంజీవ్‌సింగ్‌, ఓన్ఎన్జీసీ అధ్యక్షుడు శశిశేఖర్‌ ఆ 10మందిలో ఉన్నారు.
ఈ జాబితాలో ముకేశ్ అంబానీ 49, సంజీవ్‌సింగ్‌ 69, శశిశేఖర్‌ 77వ ర్యాంకుల్లో నిలిచారు. నిజానికి ఈ ర్యాంకింగ్స్‌లో 3వ స్థానాన్ని కైవసం చేసుకున్నారు ఆర్సెలర్ మిత్తల్ ఛైర్మన్ అండ్ సీఈఓ లక్ష్మీ మిత్తల్. ఈయన భారతీయుడే అయినప్పటికీ ఆయన కంపెనీ లగ్జంబర్గ్‌లో నమోదైంది. అందువల్ల మిత్తల్ పేరు భారతీయుల జాబితాలో పొందుపరచలేదు.
ఈ 121 మంది జాబితాలో ఎస్బీఐ, టాటా మోటర్స్‌, బీపీసీఎల్‌, టీసీఎస్ సహా మరికొన్ని భారతీయ సంస్థల సీఈఓలు కూడా ఉన్నారు.