యాక్టివ్ యూజర్లలో మళ్లీ జియోనే టాప్

యాక్టివ్ యూజర్ల పరంగా టెలికాం దిగ్గజం జియో జులైలో అగ్రస్థానాన్ని దక్కించుకుంది. జులైలో జియోకు 25 లక్షల యాక్టివ్ యూజర్లు పెరిగినట్లు టెలికాం నియంత్రణ సంస్థ ట్రాయ్ వెల్లడించింది. జూన్​లో అగ్రస్థానంలో నిలిచిన ఎయిర్​టెల్​కు జులైలో 4 లక్షల యాక్టివ్ యూజర్లు తగ్గినట్లు తెలిపింది.

టెలికాం దిగ్గజం రిలయన్స్ జియోకు జులైలో కొత్తగా 25 లక్షల యాక్టివ్ యూజర్లు పెరిగారు. దీనితో యాక్టివ్ యూజర్ల పరంగా జూన్​లో ఎయిర్​టెల్​కు దక్కిన అగ్రస్థానాన్ని.. జులైలో జియో కైవసం చేసుకుంది. జులైలో ఇతర టెలికాం దిగ్గజాలు ఎయిర్​టెల్​, వొడాఫోన్​-ఐడియాకు వరుసగా 4 లక్షలు, 38 లక్షల యాక్టివ్ యూజర్లు తగ్గారు. టెలికాం నియంత్రణ సంస్థ 'ట్రాయ్' తాజా గణాంకాల ద్వారా ఈ విషయం తెలిసింది.

దేశంలో మొత్తం వైర్​లెస్ సబ్​స్క్రైబర్ల సంఖ్య కూడా జులైలో 35 లక్షలు పెరిగినట్లు ట్రాయ్ పేర్కొంది. ఈ ఏడాది ఫిబ్రవరి తర్వాత టెలికాం సబ్​స్కైబర్ల సంఖ్య పెరగటం ఇదే తొలిసారని తెలిపింది. అయితే ఇదే నెలలో యాక్టివ్ సబ్​స్కైబర్ల సంఖ్య మాత్రం 21 లక్షలు తగ్గినట్లు ట్రాయ్ వెల్లడించింది.

మొత్తం 1,144 మిలియన్ల వైర్​లెస్ సబ్​స్క్రైబర్లలో.. జులైలో 955.8 మిలియన్ల యూజర్లు మాత్రమే యాక్టివ్​గా ఉన్నట్లు తెలిపింది.

రిపోర్టెడ్ విజిటర్ లొకేషన్ రిజిస్టర్(వీఎల్​ఆర్​) ఆధారంగా యాక్టివ్ యూజర్లను లెక్కిస్తారు.

కంపెనీల వారీగా..

• జులైలో రిలయన్స్ జియోకు 31.3 కోట్ల యాక్టివ్ యూజర్లు ఉన్నారు.
• భారత్ ఎయిర్​టెల్ యాక్టివ్ యూజర్ల సంఖ్య జులైలో 31 కోట్లు.
• వొడాఫోన్ ఐడియాకు జులైలో 26.9 కోట్ల యాక్టివ్ యూజర్లు ఉన్నారు.

ఇదీ చూడండి:పేటీఎం షాక్‌: వ్యాలెట్​లోకి నగదు బదిలీపై 2% ఛార్జీ!