జియో దూకుడు.. వినియోగదారులు @ 31.48 కోట్లు

టెలికాం రంగంలో రిలయన్స్​ జియో దూసుకెళ్తోంది. వినియోగదారుల సంఖ్యను అమాంతం పెంచుకుంటోంది. 31 కోట్ల 48 లక్షల కస్టమర్లతో అగ్రస్థానానికి వేగంగా చేరువవుతోంది. జియో జోరుతో దేశవ్యాప్తంగా టెలికాం వినియోగదారుల సంఖ్య 118 కోట్ల 37 లక్షలకు చేరింది. భారతీ ఎయిర్​టెల్​, టాటా, వొడాఫోన్​ ఐడియా లక్షలాది వినియోగదారులను కోల్పోవడం విశేషం.

ప్రైవేటు టెలికాం సంస్థ రిలయన్స్​ జియో, ప్రభుత్వ సంస్థ బీఎస్​ఎన్​ఎల్​ వినియోగదారుల సంఖ్యను గణనీయంగా పెంచుకుంటున్నాయి. 2019 మార్చి-ఏప్రిల్​ మధ్య గణాంకాలను విడుదల చేసింది భారత టెలికాం నియంత్రణ ప్రాధికార సంస్థ(ట్రాయ్​).

దేశవ్యాప్తంగా టెలికాం వినియోగదారులు 118 కోట్ల 37 లక్షల(1181. 77 మిలియన్లు) మంది ఉన్నారని తెలిపింది. 2019 మార్చిలో 1183.51 మిలియన్లుగా ఉన్న కస్టమర్ల సంఖ్య.. ఏప్రిల్​ నాటికి 0.02 శాతం పెంచుకుని 1181.77 మిలియన్లకు చేరిందని ట్రాయ్​ ప్రకటించింది.

వైర్​లెస్​ వినియోగదారులు 5 లక్షల మేర పెరిగి.. 116 కోట్ల 23 లక్షలకు చేరినట్లు గణాంకాలు స్పష్టం చేస్తున్నాయి.

భారతీ ఎయిర్​టెల్​, టాటా, వొడాఫోన్​ ఐడియా భారీ కుదుపులకు లోనైన వేళ.. ముకేశ్​ అంబానీ నేతృత్వంలోని రిలయన్స్​ జియో దూకుడు పెంచింది. ప్రభుత్వ టెలికాం సంస్థ బీఎస్​ఎన్​ఎల్​.. జియో ప్రభావాన్ని కొంతమేర తట్టుకోగలిగింది.

జియోనే అగ్రభాగాన...

ఒక్క ఏప్రిల్​లోనే రిలయన్స్​ జియో 8 మిలియన్లు(80 లక్షలు)కు పైగా కస్లమర్లను పెంచుకున్నట్లు ప్రకటించింది ట్రాయ్. మొత్తం జియో వినియోగదారుల సంఖ్య 314.8 మిలియన్లు(31 కోట్ల 48 లక్షలు)కు చేరిందని తెలిపింది​.

ఇదే సమయంలో ప్రభుత్వ సంస్థ- బీఎస్​ఎన్​ఎల్​ 2 లక్షల 32 వేల వినియోగదారులను పెంచుకొని.. 11 కోట్ల 58 లక్షలకు పైగా కస్లమర్లతో ఉంది.

ఎయిర్​టెల్ పరిస్థితి ఘోరం​..

జియో రాకతో భారీ కుదుపులకు లోనైన భారతీ ఎయిర్​టెల్​, టాటా టెలీ సర్వీసెస్​, వొడాఫోన్​ ఐడియా, ఎంటీఎన్​ఎల్​లు అంతే మొత్తంలో వినియోగదారుల విశ్వసనీయతను కోల్పోతున్నాయి. కస్టమర్ల సంఖ్య భారీగా పడిపోతోంది.

ఎయిర్​టెల్​ 32.8 లక్షలు, టాటా 29.5, వొడాఫోన్​ ఐడియా 15.8 లక్షలకు పైగా వినియోగదారులను కోల్పోయాయి.

ల్యాండ్​లైన్​ మరింత కిందకు...

ల్యాండ్​లైన్​ వినియోగదారుల సంఖ్య మరింత క్షీణించింది. ఏప్రిల్​లో 2 కోట్ల 14 లక్షలకు పైగా కస్టమర్లు ల్యాండ్​లైన్​ను వీడారు. బీఎస్​ఎన్​ఎల్​ నుంచే 2 లక్షలకు పైగా ఉన్నారు.